შოთა წეროძე

დაბადების ადგილი: ქ. სოხუმი.

დაამთავრა  საქართველოს პოლიტექნიკური ინსტიტუტის სამშენებლო ფაკულტეტი სპეციალობით სამშენებლო ნაკეთობებისა და კონსტრუქციების წარმოება 1985 წელს; 1985-1988წწ. სწავლობდა საქართველოს პოლიტექნიკური ინსტიტუტის ასპირანტურაში, სპეციალობით სამშენებლო კონსტრუქციები.

1985-1988წწ. ასპირანტურაში სწავლის პერიოდში, სრული დატვირთვით ჩაერთო საქართველოს პოლიტექნიკურ ინსტიტუტთან არსებულ სპეციალური საკონსტრუქტორო ბიუროს სამეცნიერო-კვლევით და ორგანიზაციულ საქმიანობაში; 1988 წლიდან, ასპირანტურის დამთავრების შემდეგ მუშაობს საქართველოს კოსმოსურ ნაგებობათა ინსტიტუტში ჯერ უმცროს, ხოლო შემდგომ უფროს მეცნიერ-თანამშრომლად; 1996-1997წწ. - აქტიურად მონაწილეობს "Daimler Benz Aerospace/Dornier Satelittensysteme" Gmbh", და საქართველოს კოსმოსურ ნაგებობათა ინსტიტუტის ერთობლივ პროექტში -"დიდგაბარიტიანი გასაშლელი კოსმოსური კონსტრუქციის თეორიული და ექსპერიმენტული კვლევები"; 1999 წლიდან - წამყვანი კონსტრუქტორის რანგში, მონაწილეობს საქართველო-რუსეთის ერთბლივ პროექტში "რეფლექტორი"; 2003-2006წწ. - პრეზიდენტის ბრძანებულებით დაინიშნა კოსმოსურ ნაგებობათა ინსტიტუტის დირექტორად; საქართველოს ტექნიკურ უნივერსიტეტთან ინტეგრაციის შემდეგ, მუშაობს საქართველოს ტექნიკური უნივერსიტეტის ნაგებობების, სპეციალური სისტემებისა და საინჟინრო უზრუნველყოფის ინსტიტუტში კონსტრუირების ლოგიკისა და მათემატიკური მოდელირების განყოფილების უფროსად. მის მიერაა დაპროექტებული მრავალი შენობა-ნაგებობა თბილისსა და მის შემოგარენში; მის მიერ ჩატარებული თეორიული, პრაქტიკული და რეალურად განხორციელებული პროექტების შედეგები წარმოდგენილია 35-მდე გამოქვეყნებულ სამეცნიერო ნაშრომში. ასევე დიდგაბარიტიან გასაშლელ რეფლექტორებზე გაკეთებული აქვს მოხსენებები საერთაშორისო სამეცნიერო-ტექნიკურ კონფერენციებზე. ინჟინერ-მშენებელ ტექნოლოგი, ტექნიკის მეცნიერებათა დოქტორი (2006).

საკანდიდატო დისერტაციის თემა - "დედამიწის პირობებში რეგულირებადი ორსარტყელიანი ტრანსფორმირებადი რადიოტელესკოპის კონსტრუქცია, კოსმოსში რეგულირებადი ზედაპირის შექმნის შესაძლებლობით",  დაიცვა 1997 წელს; სადოქტორო დისერტაციის თემა - "დიდი გასაშლელი ორბიტული ანტენების კოსმოსური სისტემების რადიოტექნიკური კომპლექსები", დაიცვა 2006 წელს.

წყარო: საქართველოს მეცნიერებათა დოქტორები, 1992-2006/შემდგ. და რედ.: ირინა ჯაფარიძე. -თბ., 2012. -გვ.252; ნაგებობების, სპეციალური სისტემებისა და საინჟინრო უზრუნველყოფის ინსტიტუტი: gtu.ge

• 2001 - ღირსების ორდენი
• 1999 - ღირსების მედალი

• პირველი ქართული კოსმოსური ობიექტის გენერალური კონსტრუქტორი : ელგუჯა მეძმარიაშვილი (Editor). - თბილისი, ტექნ. უნ-ტი, 2016. - 404გვ.. - ISBN: 9789941084065