შოთა ჭალაგანიძე

დაბადების ადგილი: ქ. თბილისი.

დაამთავრა საქართველოს სასოფლო-სამეურნეო ინსტიტუტის სოფლის მეურნეობის მექანიზაციის ფაკულტეტი ინჟინერ- მექანიკოსის კვალიფიკაციით 1956 წელს.

მუშაობდა სასოფლო-სამეურნეო ინსტიტუტში, ხოლო შემდეგ საქართველოს სოფლის მეურნეობის მექანიზაციისა და ელექტრიფიკაციის სამეცნიერო-კვლევით ინსტიტუტში რიგითი ტექნიკოსიდან ლაბორატორიის ხელმძღვანელამდე; 1962 წლიდან - საქართველოს კპ ცკ-ის სოფლის მეურნეობის განყოფილების ინსტრუქტორი; შემდეგ, სოფლის მეურნეობის მეცნიერებისა და ტექნიკის სექტორის გამგე, განყოფილების გამგის მოადგილე; 1973 წლიდან - კპ ბორჯომის რაიკომის პირველი მდივანი; 1977-1988წწ. - საქართველოს სსრ სატყეო მეურნეობის მინისტრი; 1988-1991წწ. - საქართველოს სსრ ბუნების დაცვისა და სატყეო მეურნეობის სახელმწიფო კომიტეტის თავმჯდომარე; 1991 წლიდან - სახელმწიფო კონცერნ "საქსოფლმანქანათმშენის" უფროსი და სასოფლო-სამეურნეო მანქანათმშენებლობის სამეცნიერო-კვლევითი და საკონსტრუქტორო ტექნოლოგიური ინსტიტუტის "საქაგრომანქანის" გენერალუი - დირექტორი; 1997 წლიდან - საქართველოს მრეწველობის სამინისტროს მრეწველობის სტრატეგიული განვითარებისა და სამეცნიერო-ტექნიკური უზრუნველყოფის დეპარტამენტის უფროსი; 2002 წლიდან - ახლად შექმნილი "საქინოვაციის" გენერალური დირექტორი. სხვადასხვა დროს ეწეოდა პედაგოგიურ საქმიანობას საქართველოს აგრარულ და ტექნიკურ უნივერსიტეტებში, სადაც მუშაობდა პროფესორის თანამდებობაზე. 2004 წლიდან - საქართველოს სოფლის მეურნეობის მეცნიერებათა აკადემია, ვიცე-პრეზიდენტი, 2005–2012წწ. - პრეზიდენტი. არჩეული იყო საქართველოს უმაღლესი საბჭოს მრავალი მოწვევის დეპუტატად; დაჯილდოებულია მთავრობის ჯილდოებით, მიღებული აქვს "წლის საუკეთესო ინჟინერის" წოდება. ნაყოფიერი მუშაობა აქვს ჩატარებული სამთო მიწათმოქმედების მექანიზაციის ტექნიკურ საშუალებათა კვლევის, დამუშავებისა და გამოყენების მიმართულებით; მან მნიშვნელოვანი წვლილი შეიტანა ჩაის მოვლა-მოყვანის მანქანათა კომპლექსის შექმნასა და წარმოებაში ფართოდ დანერგვის საქმეში; აგრეთვე მის მიერ დამუშავებული იქნა კლდოვანი ფერდობების გატყევების სამუშაოთა ახალი ტექნოლოგიები და ტექნიკური საშუალებები, რის საფუძველზედაც ჩატარდა კლდოვანი ფერდობების გატყევება რამდენიმე ათას ჰექტარზე. გამოქვეყნებული აქვს 233 სამეცნიერო ნაშრომი (60-მდე ნაშრომი საზღვარგარეთ), არის 14 წიგნის, 2 მონოგრაფიისა და 10 გამოგონების ავტორი. ინჟინერ-მექანიკოსი, ტექნიკის მეცნიერებათა დოქტორი (1994), პროფესორი (1996).

წყარო: საქართველოს მეცნიერებათა დოქტორები, 1992-2006/შემდგ. და რედ.: ირინა ჯაფარიძე. -თბ., 2012. -გვ.253; საქართველოს სოფლის მეურნეობის მეცნიერებათა აკადემია: gaas.dsl.ge; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.114

• ეკოლოგიურ მეცნიერებათა აკადემია, ნამდვილი წევრი
• საერთაშორისო საინჟინრო აკადემია, აკადემიკოსი
• საქართველოს საინჟინრო აკადემია, აკადემიკოსი
• საქართველოს სოფლის მეურნეობის მეცნიერებათა აკადემია, აკადემიკოსი (2004-2018)

• 1998 - ღირსების ორდენი
  საქართველოს სატყეო და სოფლის მეურნეობის განვითარებაში შეტანილი პირადი დიდი წვლილისა და ნაყოფიერი სამეცნიერო-პედაგოგიური და საზოგადოებრივი მოღვაწეობისათვის
• ხალხთა მეგობრობის ორდენი
• საქართველოს სახელმწიფო პრემია, მეცნიერებისა და ტექნიკის დარგში
• საქართველოს დამსახურებული ინჟინერი

• სამთო სოფლის მეურნეობა : განვითარების სტრატეგია და პრიორიტეტები (ავტორი). - თბილისი, არეალი, 2008. - 48გვ.
• მეცხოველეობის ფერმების ტექნოლოგიური მოწყობილობის მონტაჟი, ექსპლოატაცია და რემონტი (თანაავტორი). - თბილისი, საბჭ. საქართველო, 1969. - 187გვ.
• მანქანათა დეტალების აღდგენა მონიკელებით (ავტორი). - თბილისი, საბჭ. საქართველო, 1968. - 54გვ.
• ავტო-სატრაქტორო სასტარტერო აკუმულატორთა ბატარეების ექსპლოატაცია და რემონტი (თანაავტორი). - თბილისი, საქსოფლტექნიკა, ტექ. ინფორმაციის ბიურო, 1967. - 32გვ.
• მანქანათა დეტალების აღდგენა დაფოლადებით (ავტორი). - თბილისი, მეცნიერება, 1967. - 54გვ.
• მანქანათა დეტალების აღდგენა დაქრომვით (ავტორი). - თბილისი, სამეცნ-ტექნ. ინფორმაციისა და პროპაგანდის ინ-ტი, 1965. - 40გვ.