რომან გველესიანი

დაამთავრა ბიდგოშჩის უმცროს ოფიცერთა სკოლა 1923 წელს; სწავლობდა ვარშავის უმაღლესი სამხედრო სკოლა.

დაიბადა რუსეთის არმიის ოფიცრის, ალექსანდრე გველესიანისა და თამარ (ვარვარა) დავითის ასული ჭავჭავაძის ოჯახში. 1909 წლიდან სამხედრო სამსახურში იყო; 1914-1918წწ. I მსოფლიო ომის დროს მსახურობდა ლაიბ-გვარდიის ერევნის მე-13 პოლკის პორუჩიკად, 1916 წლიდან - რჟევის 490-ე ქვეითი პოლკის კაპიტნად; 1917 წლის თებერვალში მიიღო პოდპოლკოვნიკის წოდება. 1918 წლიდან იყო საქართველოს ჯარის პოლკოვნიკი; 1921 წელს, საქართველოს საბჭოთა ოკუპაციის შემდეგ, გველესიანი ემიგრაციაში იყო პოლონეთში; 1926 წლის ოქტომბრიდან კონტრაქტით მსახურობდა პოლონეთის არმიაში; 1927-1929წწ. იყო პულავის მენაღმეთა მე-2 პოლკის მეთაურის მოადგილე; 1930 წლიდან ირიცხებოდა მე-4 ქვეითი დივიზიის შტაბში; 1938 წლის მარტიდან მსახურობდა მე-6 ქვეითი დივიზიის მეთაურის მოადგილედ; 1939-1945წწ. II მსოფლიო ომის დასაწყისში ხელმძღვანელობდა კრაკოვის გამაგრებულ რაიონს; შემდეგ იმყოფებოდა პრჟემისლში, ბრიგადის გენერალ ბოლესლავ იატელნიცის შტაბში; იცავდა დნესტრის ხაზს; პოლონეთის ოკუპაციის შემდეგ ერთხანს წინააღმდეგობის მოძრაობაში იყო, მალე სხვა პოლონელ სამხედროებთან ერთად ევაკუირებული იყო რუმინეთში, საიდანაც ჯერ საფრანგეთში, შემდეგ კი დიდ ბრიტანეთში გადავიდა; აქტიურად თანამშრომლობდა პოლონურ პოლიტიკურ ემიგრაციასთან; გარდაიცვალა და დაკრძალულია ლონდონში; სამხედრო მოღვაწე. რუსეთის, საქართველოს და პოლონეთის არმიების პოლკოვნიკი.

წყარო: ქართველები პოლონეთში / ამბროსი გრიშიკაშვილი. - თბილისი, 2008. - გვ. 188-191; gwar.mil.ru

• 1917 - წმინდა ვლადიმირის II ხარისხის ორდენი
  ბრძოლის ველზე თავის გამოჩენისთვის
• 1916 - წმინდა ვლადიმირის IV ხარისხის ორდენი
  ბრძოლის ველზე თავის გამოჩენისთვის
• 1916 - წმინდა ანას II ხარისხის ორდენი
  ბრძოლის ველზე თავის გამოჩენისთვის
• 1916 - წმინდა სტანისლავის II ხარისხის ორდენი
  ბრძოლის ველზე თავის გამოჩენისთვის
• 1915 - წმინდა სტანისლავის III ხარისხის ორდენი
• 1915 - წმინდა ანას III ხარისხის ორდენი
  ბრძოლის ველზე თავის გამოჩენისთვის
• 1915 - წმინდა ანას IV ხარისხის ორდენი
  ბრძოლის ველზე თავის გამოჩენისთვის