ზურაბ გეწაძე

დაბადების ადგილი: ამბროლაურის რაიონი.

დაამთავრა საქართველოს პოლიტექნიკური ინსტიტუტის არქიტექტურის ფაკულტეტი, არქიტექტურის სპეციალობით 1981 წელს.

1981-1985წწ. მუშაობდა თბილისის ზონალურ სამეცნიერო-კვლევით და ექსპერიმენტული პროექტირების ინსტიტუტში ("თბილზნიეპი"), არქიტექტორად, უფროს არქიტექტორად; 1985-1990წწ. თბილისის საქალაქო საბჭოს აღმასკომის საპროექტო ბიუროს წამყვან არქიტექტორად; ასევე იყო საპროექტო კოოპერატივ "ანდრატის" დამფუძნებელი და მთავარი არქიტექტორი; 1990-1997წწ. მუშაობდა ქ. თბილისის მერიის სახაზინო საწარმო "არქდიზაინსერვისი"-ს არქიტექტორთა ჯგუფის უფროსად, არქიტექტურული სახელოსნოს ხელმძღვანელად; 1998-2000წწ. იყო ამავე საწარმოს დირექტორი; 2001-2004წწ. იყო საპროექტო-სამშენებლო კომპანია "არტგეიზი"-ს დამფუძნებელი და დირექტორი; 2005 წლიდან შპს "გასნიკ-კომპანის" ერთ-ერთი დამფუძნებელი და მთავარი არქიტექტორი; 2007 წლიდან შპს "გეთს-ჯგუფის" დამფუძნებელი და მთავარი არქიტექტორია; მისი მონაწილეობითა და ხელმძღვანელობით დამუშავებულ იქნა და განხორციელდა მრავალი მნიშვნელოვანი ობიექტების პროექტები. მათ შორის: პიონერთა ბანაკი-პანსიონატი 240 ადგილზე, კრასნოდარის მხარის გილენჯიკის რაიონში (1981-1983), "საბავშვო ბაღი 190 ადგილზე", რთული რელიეფისათვის, ტიპური პროექტი (1984-1985), ღია კინოთეატრი საქარხნო რაიონში (ქ. თბილისი, 1987), სუპერმარკეტი ჭიჭინაძის ქუჩაზე (ქ. თბილისი, 1989), მრავალბინიანი საცხოვრებელი სახლები ხორავას ქუჩაზე (ქ. თბილისი, 2002), ეკლესიები ამბროლაურისა და ონის რაიონის ტერიტორიაზე (2004-2007), ინდივიდუალური საცხოვრებელი სახლები - წავკისში, საირმის გორაზე, ცაგარელისა და ლვოვის ქუჩაზე (ქ. თბილისში, 1997-2004წწ.), მრავალფუნქციური, მრავალსართულიანი საცხოვრებელი სახლი, ფარნავაზ მეფის გამზირზე, დიდ დიღომში (ქ. თბილისი,2014წ.), მრავალსართულიანი სასტუმრო უსახელაურის ქუჩაზე (ქ. თბილისში, 2017წ.) და სხვა; არის კონკურსების მონაწილე - საქართველოს "სახმშენის" კონკურსი "მრავალბლოკიანი ინდივიდუალური საცხოვრებელი სახლის პროექტი" - II პრემია, "ქ. თბილისში, მოსკოვის გამზირის №9 და №9ა-ს მიმდებარე ტერიტორიის მრავალფუნქციური განაშენიანება" - არქიტექტორთა კავშირის დიპლომი - "წლის საუკეთესო არქიტექტურული პროექტი", ავტორთა ჯგუფთან ერთად (2007).

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 87-88

• საქართველოს არქიტექტორთა კავშირი, წევრი