ალექსანდრე გვენეტაძე

დაბადების ადგილი: სოფელი გომი, სამტრედიის რაიონი.

დაამთავრა ბათუმის ინდუსტრიული ტექნიკუმი და მიენიჭა მშენებელ-ტექნიკოსის კვალიფიკაცია 1934 წელს; სწავლა გააგრძელა ქ. მოსკოვის კუიბიშევის სახელობის სამშენებლო-საინჟინრო ინსტიტუტში, რომელიც დაამთავრა 1939 წელს და მიენიჭა ინჟინერ-მშენებლის კვალიფიკაცია.

ინსტიტუტის დამთავრების შემდეგ მუშაობდა ქ. მოსკოვის გორბუნოვის სახელობის ქარხანაში ინჟინრად; საქართველოში დაბრუნების შემდეგ მუშაობა დაიწყო ქ. თბილისის საავიაციო ქარხნის მშენებლობაზე, სამუშაოთა მწარმოებლად; მალე იგი გადაჰყავთ ქ. თბილისის ორჯონიკიძის სახელობის რაისაბჭოს აღმასკომის საბინაო სამმართველოს უფროსად; მუშაობდა ბულაჩაურის წყალსადენის მშენებლობაზე ინჟინრად, შემდეგ კი, როგორც პერსპექტიული ახალგაზრდა სპეციალისტი, გადაიყვანეს საქართველოს კომუნალური მეურნეობის სამინისტროს კაპირალური მშენებლობის განყოფილების უფროსის თანამდებობაზე; 1960 წლიდან მუშაობდა პროფკავშირების კურორტების მართვის საქართველოს რესპუბლიკური საბჭოს უფროს ინჟინრად; 1967 წელს დაინიშნა ბიჭვინთის მაღლივი პანსიონატების საკურორტო კომპლექსის მშენებლობის დირექციის მთავარ ინჟინრად; დიდი წვლილი მიუძღვის აღნიშნული საკურორტო კომპლექსის I რიგის ობიექტების დადგენილ ვადაში საექსპლუატაციოდ ჩაბარების უზრუნველყოფის საქმეში; მიღებული ჰქონდა სახელმწიფო ჯილდოები და საუწყებო საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 90

• საქართველოს დამსახურებული ინჟინერი
  მრავალწლიანი წარმატებული შრომითი საქმიანობისა და დამსახურებისათვის