გიორგი ოსტატი

XVIII საუკუნის დასასრულისა და XIX საუკუნის დასაწყისის ქართველი ოსტატი; 1811 წელს ვაშლოვანში (თეთრი წყაროს რაიონი) აუგია კოშკი (მოხსენიებულია კოშკის წარწერაში); გეგმით წრიული, სამსართულიანი კოშკი ნაგებია რიყის ქვითა და აგურით; ყოველ სართულზე თითო ოთახია. საგანგებოდ არის დამუშავებული სამხრეთი (სოფლისკენ მიმართული) მხარე; აგურით ნაშენ შვერილ ნაწილში ორი ღრმა თაღია; ქვედაში შესასვლელია, ზედაში კი დატანებულია დარბაზის აივნის კარი; კარს ზემოთ ორბელიანების გერბიანი ყვითელი ქვა არის ჩასმული; კოშკის გარეგანი სახე, პროპორციები, ტექნიკურად შესრულების მაღალი დონე მოწმობს, რომ კოშკის ამშენებელი გვიანფეოდალური ხანის ხუროთმოძღვრულ ტრადიციებზე აღზრდილი და დახელოვნებული ოსტატი ყოფილა.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 93