იასონ გრიგოლია

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1962 წელს.

1962-1964წწ. მუშაობდა საპროექტო ორგანიზაციაში "საქგიპრომეზი" - ინჟინრად, ჯგუფის ხელმძღვანელად; 1964-1970წწ. მუშაობდა სახელმწიფო საპროექტო ინსტიტუტში "საქსახპროექტი" - მთავარ სპეციალისტად; 1970-1972წწ. მუშაობდა საქართველოს მშენებლობის სამინისტროს №15 სამშენებლო-სამონტაჟო ტრესტში უფროს სამუშაოთა მწარმოებლად; 1972-1975წწ. მშენებლობის სამინისტროს №3 სამშენებლო ტრესტ "საქმრეწვმშენში" №8 სამშენებლო სამმართველოს მთავარ ინჟინრად; 1975-1998წწ. მუშაობდა სახელმწიფო საპროექტო ინსტიტუტ "საქსახპროექტში" პროექტის მთავარ ინჟინრად; 1998 წლიდან მუშაობს საპროექტო ორგანიზაციაში შპს "მშენპროექტი"- პროექტის მთავარ ინჟინრად; მისი მონაწილეობითა და ხელმძღვანელობით დამუშავებულ იქნა მრავალი მნიშვნელოვანი სამრეწველო საწარმოს პროექტი, მათ შორის: რუსთავის მეტალურგიული ქარხნის რიგი საამქროების, სახლმშენებელი კომბინატების, ბოქაროს მეტალურგიული ქარხნის (ინდოეთი), ქ. ფოთის სამრეწველო ზონისა და საზღვაო პორტის რეკონსტრუქცია, ნავთობისა და ნავთობპროდუქტების გადამტვირთავი ტერმინალის კომპლექსი ყულევში და სხვა; უშუალოდ მონაწილეობდა ქ. თბილისის ცენტრალური საფეხბურთო სტადიონის ("დინამოს"), საიუველირო ქარხნის, თერაპიის ინსტიტუტის, ქ. თბილისის საცხოვრებელი კვარტლების მშენებლობაში და სხვა; ასევე, მონაწილეობდა და ხელმძღვანელობდა მრავალი საკომუნიკაციო და ინფრასტრუქტული ობიექტების პროექტირებას საქართველოს რაიონებში, აგრეთვე კულტურული მემკვიდრეობის ძეგლების და სხვა; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 104