ვაჟა კვეტენაძე

დაბადების ადგილი: ქ. ჭიათურა.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი, სამრეწველო და სამოქალაქო მშენებლობის სპეციალობით 1964 წელს.

1964 წელს გაიწვიეს საბჭოთა არმიის რიგებში, სადაც მუშაობდა სამშენებლო ნაწილში, სარაკეტო ბაზების მშენებლობაზე, ოფიცრის რანგში; 1966-1967წწ. მუშაობდა საქართველოს მშენებლობის სამინისტროს №8 სამშენებლო ტრესტ "ჭიათურმანგანმშენი"-ს სამშენებლო სამმართველოში სამუშაოთა მწარმოებლად; 1967-1972წწ. საქართველოს განათლების სამინისტროს კაპიტალური მშენებლობის სამმართველოს უფროს ინჟინრად; 1972-1978წწ. იყო საქართველოს ბეჭდვითი სიტყვის სახელმწიფო კომიტეტის კაპიტალური მშენებლობის სამმართველოს უფროსი ინჟინერი; 1978-2004წწ. მუშაობდა საქართველოს ჯანმრთელობის დაცვის სამინისტროს კაპიტალური მშენებლობის სამმართველოს უფროს ინჟინრად, ტექნიკური განყოფილების უფროსად, კაპიტალური მშენებლობის სამმართველოს უფროსად; 2004-2013წწ. იყო ქ. თბილისის ონკოლოგიური ცენტრის სამეურნეო განყოფილების ხელმძღვანელი, 2014-2016წწ. ხელმძღვანელობდა ქ. თბილისის ალ. ალადაშვილის სახელობის კლინიკის აღდგენა-რეკონსტრუქციის სამუშაოებს; მისი უშუალო მონაწილეობითა და ხელმძღვანელობით აშენდა არაერთი სამრეწველო, კულტურულ-საგანმანათლებლო და სამედიცინო დანიშნულების მნიშვნელოვანი ობიექტი, მათ შორის: წიგნის ფაბრიკა დიღომში (ქ. თბილისი), საშუალო სკოლები და საბავშვო ბაღები ქ. რუსთავში, მარნეულის, წალკის, დმანისის, თეთრი წყაროსა და ბოლნისის რაიონებში; საავადმყოფოები ქ. ქუთაისსა და ქ. თელავში, სამშობიარო სახლი ქ. ჭიათურაში, სამამულო ომის ინვალიდთა ჰოსპიტალი, ბავშვთა რეაბილიტაციის ცენტრი და სამეცნიერო-კვლევითი ინსტიტუტები ქ. თბილისში და სხვა; მრავალი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 151-152