დიმიტრი ბურდიაშვილი

დაბადების ადგილი: სოფელი შილდა, ყვარლის რაიონი.

დაამთავრა თბილისის სახელმწიფო უნივერსიტეტი.

მუშაობდა საქართველოს რადიოკომიტეტში. იყო ორგანიზაცია "სამანის" წევრი (საქართველოს აყვავებისათვის მებრძოლი ახალგაზრდა ნაციონალისტები) - იატაკქვეშა პატრიოტული ორგანიზაცია მეორე მსოფლიო ომის დროინდელ საბჭოთა საქართველოში, რომელიც მიზნად ისახავდა საბჭოთა რეჟიმის დამხობას შეიარაღებული აჯანყების გზით და საქართველოს სახელმწიფოებრივი დამოუკიდებლობის აღდგენას. საქართველოს შინაგან საქმეთა სამინისტროს არქივში დაცული დოკუმენტების მიხედვით, შეთქმულებიდან ყველაზე ადრე, 1942 წლის 2 იანვარს, დიმიტრი ბურდიაშვილი, როგორც დეზერტირი ისე დააპატიმრეს, იგი 1941 წლიდან ირიცხებოდა წითელი არმიის რიგებში; დაპატიმრების დროს დიმიტრი ბურდიაშვილი იყო 35-ე პოლკის უმცროსი ლეიტენანტი, ამავე მასალების მიხედვით იგი იყო არალეგალური, მეამბოხე-რევოლუციურ ორგანიზაციის წევრი; წითელი არმიის რიგებში ყოფნის დროს აქტიურად ეწეოდა კანონსაწინააღმდეგო აგიტაციასა და პროპაგანდას, შეიარაღებული გზით მოუწოდებდა საბჭოთა ხელისუფლების დამხობის და საქართველოს დამოუკიდებლობის აღდგენას. დიმიტრი ბურდიაშვილს მიესაჯა სასჯელის უმაღლესი ზომა – დახვრეტა ქონების კონფისკაციით. რეპრესირებული, რეაბილიტირებული.

წყარო: XX საუკუნის 40-იანი წლების ეროვნული მოძრაობა : (სამანელები) / ნატა თეთვაძე.-თბ.,2021.-გვ.16 (dl.sangu.edu.ge)