შალვა შავიანიძე

დაბადების ადგილი: ქ. ქუთაისი.

დაამთავრა თბილისის სახელმწიფო უნივერსიტეტი ქართული ენა და ლიტერატურის სპეციალობით 1940 წელს; სწავლობდა ასპირანტურაში.

საბჭოთა კავშირ-გერმანიის ომის დაწყებასთან დაკავშირებით, 1941 წლის 27 აგვისტოს შალვა შავიანიძე საბჭოთა არმიის რიგებში გაიწვიეს, უმცროს ოფიცერთა მოსამზადებელი კურსების დამთავრების შემდეგ მას მიენიჭა უმცროსი ლეიტენანტის სამხედრო წოდება. მსახურობდა ავჭალის მსროლელთა 35-ე სათადარიგო პოლკში. 1942 წლის 10 იანვრის იგი დააპატიმრეს შეთქმულებაში მონაწილეობისთვის, მას ბრალად ედებოდა "არალეგალურ-კონტრრევოლუციური ფაშისტური ორგანიზაციის აქტიური წევრობა, შეთქმულებაში მონაწილეობის მიზნით ადამიანების გადაბირება და აჯანყებისათვის მზადება. ამიერკავკასიის სამხედრო ტრიბუნალმა შალვა შავიანიძეს მიუსაჯა სასჯელის უმაღლესი ზომა – დახვრეტა ქონების კონფისკაციით. (იყო ორგანიზაცია "სამანის" წევრი, საქართველოს აყვავებისათვის მებრძოლი ახალგაზრდა ნაციონალისტები - იატაკქვეშა პატრიოტული ორგანიზაცია მეორე მსოფლიო ომის დროინდელ საბჭოთა საქართველოში, რომელიც მიზნად ისახავდა საბჭოთა რეჟიმის დამხობას შეიარაღებული აჯანყების გზით და საქართველოს სახელმწიფოებრივი დამოუკიდებლობის აღდგენას). რეპრესირებული.

წყარო: XX საუკუნის 40-იანი წლების ეროვნული მოძრაობა : (სამანელები) / ნატა თეთვაძე.-თბ.,2021.-გვ.23 (dl.sangu.edu.ge)