რობერტ კოპალიანი

დაბადების ადგილი: სოფელი ვოლოდაროვკა, სოხუმის რაიონი.

დაამთავრა საქართველოს პოლიტექნიკური ინსტიტუტის სატრანსპორტო ფაკულტეტი, ხიდებისა და გვირაბების მშენებლობის სპეციალობით 1962 წელს.

1962-1964წწ. მუშაობდა ამიერკავკასიის რკინიგზის სამმართველოს სისტემაში, ქ. თბილისის სალიანდაგო სამსახურის ინჟინრად; 1964 წლიდან გადადის ქ. გაგრაში და მუშაობას იწყებს საქართველოს მშენებლობის სამინისტროს ტრესტ "ბიჭვინთმშენის" №2 სამშენებლო სამმართველოში სამუშაოთა მწარმოებლად, შემდეგ იყო ამავე სამმართველოს უფროსი სამუშაოთა მწარმოებელი; 1967 წელს დაინიშნა საქართველოს მშენებლობის სამინისტროს სამშენებლო ტრესტ "ბიჭვინთმშენის" №3 სამშენებლო სამმართველოს უფროსად, რომელიც აქტიურად იყო ჩართული ოქტომბრის რევოლუციის 100 წლისთავისათვის, ბიჭვინთის საკურორტო კომპლექსის I რიგის გაშვებასთან დაკავშირებული ობიექტების მშენებლობაში; 1968-1970წწ. მუშაობდა საქართველოს კომპარტიის გაგრის რაიონული კომიტეტის ინსტრუქტორად; 1970 წელს კომპარტიის რაიონული კომიტეტის რეკომენდაციით გადაყვანილ იქნა ბიჭვინთის მაღლივი პანსიონატების, საერთაშორისო მნიშვნელობის საკურორტო კომპლექსის დირექტორის მოადგილედ ექსპლუატაციისა და მშენებლობის დარგში, სადაც მუშაობდა 1973 წლამდე; 1974 წელს გადაყვანილ იქნა ქ. გაგრის სამრეწველო კომბინატის დირექტორად, სადაც მუშაობდა 1976 წლამდე; 1976-1978წწ. მუშაობდა საქართველოს მშენებლობის სამინისტროს №16 სამშენებლო ტრესტ "კურორტმშენის" №2 სამშენებლო სამმართველოს უფროსად; დიდი წვლილი აქვს შეტანილი ბიჭვინთის მაღლივი პანსიონატების საერთაშორისო მნიშვნელობის საკურორტო კომპლექსის მშენებლობაში; მისი უშუალო მონაწილეობითა და ხელმძღვანელობით აშენდა ბიჭვინთის საკურორტო კომპლექსის მნიშვნელოვანი ობიექტები, მათ შორის: ადმინისტრაციულ-სავაჭრო ცენტრი, საკურორტო პოლიკლინიკა, საკურორტო სასადილო 1300 ადგილზე, საზაფხულო კინოთეატრი, კურორტის ფაბრიკა-სამზარეულო, წყალსადენისა და კანალიზაციის მაგისტრალური ქსელები, სატუმბო სადგურებით და გამწმენდი ნაგებობები; ასევე სსრკ მწერალთა კავშირის შემოქმედებითი სახლი 450 ადგილზე და გაზეთ "პრავდის" გამომცემლობის დასასვენებელი სახლი 350 ადგილზე, დაბა ბიჭვინთაში და სხვა; მრავალწლიანი შრომითი საქმიანობისა და დამსახურებისათვის მიღებული ჰქონდა საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 163-164