ვაჟა მაჩაიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი წყალმომარაგება-კანალიზაციის სპეციალობით.

1966 წლიდან პარალელურად მუშაობდა თბილისის ზონალურ სამეცნიერო-საკვლევ და ექსპერიმენტულ პროექტირების ინსტიტუტში სხვადასხვა თანამდებობებზე; ინსტიტუტის დამთავრების შემდეგ 1973 წლამდე იყო პროექტის მთავარი ინჟინერი; 1973-1995წწ. მუშაობდა "კავსოფლმრეწვმშენსახპროექტში" მთავარ სპეციალისტად, მთავარი ინჟინრის მოადგილედ და ტექნიკური განყოფილების უფროსად; 1978-1980წწ. მივლინებით იმყოფებოდა ვიეტნამის სოციალისტურ რესპუბლიკაში ჰოა-ბინის ჰიდროელექტრო სადგურის მშენებლობისათვის ახალი ქალაქის ჰოა-ბინის პროექტირებაზე; 1988 წელს მივლინებით იმყოფებოდა ნიკარაგუაში ჯგუფის უფროსად, სასოფლო-სამეურნეო მანქანა-ტრაქტორების ტექნიკური მომსახურეობის სადგურის პროექტის შედგენისათვის; 1991-1994წწ. მივლინებული იყო ლიბიის არაბეთის ჯამახირიაში სარწყავი სისტემების პროექტირებაზე; 2003 წლიდან მუშაობს ასოციაცია "ატუ"-ში მთავარ სპეციალისტად; მინაწილეობდა შეკვეთილის 800 ადგილიანი საასტუმროსა და 10000 ადგილიანი საკონცერტო დარბაზის, ბათუმისა და ურეკის დელფინარიუმის პროექტირებაში; ასევე რუსთაველის სახ. დრამატული თეატრის, მარჯანიშვილის სახ. დრამატული თეატრის, გრიბოედოვის სახ. დრამატული თეატრის, ბათუმის ი. ჭავჭავაძის სახელობის დრამატული თეატრის, პ. ადამიანის სახელობის სომხური დრამატული თეატრის სარეკონსტრუქციო სამუშაოების პროექტირებაში; მიღებული აქვს მონაწილეობა რაგბის კომპლექსების პროექტირებაში.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 184-185