გიორგი მირზიკაშვილი

დაბადების ადგილი: სოფელი ყვარელი, ყვარლის რაიონი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1968 წელს.

1968 წელს მუშაობას იწყებს საკავშირო საპროექტო ინსტიტუტ "გიპრომეზი"-ს ქ. მაგნიტოგორსკის ფილიალში, ინჟინერ-კონსტრუქტორად; აღნიშნულ საპროექტო ინსტიტუტში მუშაობის პერიოდში მონაწილეობა მიიღო ისეთი მნიშვნელოვანი პროექტების დამუშავებაში, როგორიც იყო მაგნიტოგორსკის მეტალურგიული კომბინატის პირველი მარტენის რეკონსტრუქცია, კომბინატის თუნუქის საამქროს პროექტი; მისი ავტორობით დამუშავებულ იქნა კომბინატის ბლუმინგის საამქროს გადაიარაღების პროექტის სამშენებლო ნაწილი; 1971 წელს ბრუნდება საქართველოში და მუშაობას იწყებს თბილისის საქალაქო საბჭოს აღმასკომის დაქვემდებარებაში არსებულ სამშენებლო-სამონტაჟო ტრესტ "ინჟმშენში" მშენებელ ოსტატად; 1972 წელს გადაყვანილ იქნა საქართველოს მშენებლობის სამინისტროს სამშენებლო-სამინტაჟო ტრესტ "სპეცმშენში". სადაც მუშაობდა სამუშაოთა მწარმოებლად, უფროს სამუშაოთა მწარმოებლად (უბნის უფროსად); 1975-1979წწ. მუშაობდა საქართველოს მინისტრტა საბჭოს კაპიტალური მშენებლობის მთავარ სამმართველოში ადმინისტრაციული, ჯანმრთელობის დაცვისა და სოცუზრუნველყოფის სფეროს ობიექტების მშენებლობის განყოფილების უფროსად; 1980 წელს გადაყვანილ იქნა საქართველოს სახელმწიფო საგეგმო კომიტეტის საქმეთა მმართველობის სისტემაში, მთავარ სპეციალისტად, შემდეგ საქმეთა მმართველის მოადგილე; კურირებდა საკუთარი მშენებლობის ობიექტებს; 1995-1996წწ. მუშაობდა ქ. თბილისის მერიის არქიტექტურის დეპარტამენტში საქმეთა მმართველად; 1997-2000წწ. საქართველოს საგარეო საქმეთა სამინისტროში მატერიალური უზრუნველყოფის დეპარტამენტში სამმართველოს უფროსად; 2003 წელს იყო ჰოლდინგ "იმედის" დირექტორი მშენებლობის საკითხებში და ხელმძღვანელობდა ტელეკომპანია "იმედი"-ს ადმინისტრაციული შენობის სამშენებლო სამუშაოების შესრულებას; 2004-2006წწ. მუშაობდა მსოფლიო ბანკის პროგრამის მენეჯერად საქართველოს წარმომადგენლობაში, სამედიცინო დაწესებულებების (ამბულატორიების) მშენებლობის საკითხებში; 2006-2011წწ. იყო რუსთავის მეტალურგიული ქარხნის ტექნიკური განყოფილების მთავარი სპეციალისტი; დიდი ღვაწლი აქვს შეტანილი საქართველოს რაიონებში ადგილობრივი თვითმმართველობის ორგანოების, ასევე ჯანმრთელობის დაცვისა და სოციალური უზრუნველყოფის სფეროს დაწესებულებების მატერიალურ-ტექნიკური ბაზის განვითარების საქმეში; ძირითადი პროფესიული საქმიანობის პარალელურად, მშობლიური რაიონის მასშტაბით ეწეოდა საზოგადოებრივ მოღვაწეობას. კერძოდ, აქტიურად მონაწილეობდა ქ. ყვარელში მოსალოდნელი ღვარცოფული მოვლენებისაგან ქალაქის დამცავი ნაგებობების მშენებლობის ორგანიზებაში; 2000-2004წწ. არჩეული იყო მადნეულის სამთოგამამდიდრებელი კომბინატის სამეთვალყურეო საბჭოს წევრად; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 199-201