გრიგოლ თარხან-მოურავი

გრიგოლ თარხან-მოურავი საქართველოს ეროვნულ საკითხს ეკონომიკური მიმართულებით განიხილავდა, ხოლო მის მომავალ საზოგადოებრივ წყობილებას მეცნიერული თვალსაზრისით არკვევდა; ეხებოდა შრომის საკითხებს კაპიტალიზმის წინააღმდეგ, მოითხოვდა სხვადასხვა ასოციაციების შექმნას და სხვ. გრიგოლ თარხან-მოურავის ნაწარმოებების შინაარსია: 1) საქართველოს 1860-1870 წლების საზოგადოებრივ-სახელმწიფოებრივი აგებულებისა და კაპიტალისტური წყობილების კრიტიკა, 2)კოლექტიური მეურნეობის (სამეურნეო ასოციაციების) განვითარება, 3) ეროვნული საკითხი ეკონომიკური თვალსაზრისით, 4) მუშათა შრომის საკითხი და სხვ. გრიგოლ თარხან-მოურავი ეკუთვნის 1860-1870-იანი წლების მოწინავე ქართველ მოღვაწეთა (მ. ქიქოძე, ნ. ნიკოლაძე და სხვ.) ჯგუფს. პუბლიცისტურ წერილებს აქვეყნებდა გაზეთ "დროებაში", ჟურნალ "მნათობში"; ცენზურა  ხშირად ამ მასალებს შეკვეცილი და დამახინჯებული ფორმით აწვდიდა მკითხელებს. პუბლიცისტ-ეკონომისტი, ასოციაციების შექმნის იდეის მქადაგებელი.

წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.264