პეტრე ჭიჭაღუა

დაბადების ადგილი: ქ. ხონი.

დაამთავრა საქართველოს პოლიტექნიკური ინსტიტუტის სატრანსპორტო ფაკულტეტი მიმოსვლის გზათა ინჟინერ-მშენებლის სპეციალობით 1960 წელს.

1960 წელს მუშაობა დაიწყო საპროექტო ინსტიტუტ "გიპრომეზში" ინჟინერ-დამპროექტებლად, რუსთავის მეტალურგიული ქარხნის პროექტირებასთან დაკავშირებით; 1961 წელს გადაიყვანეს რუსთავის მეტალურგიული ქარხნის დირექციაში კაპიტალური მშენებლობის სამმართველოს საწარმოო-ტექნიკური განყოფილების უფროს ინჟინრად; 1964 წლიდან მუშაობდა ქ. თბილისის ჰიდროენერგეტიკის ნაგებობათა სამეცნიერო-კვლევით ინსტიტუტში (შემდეგში საქართველოს ენერგეტიკის ჰიდროტექნიკურ ნაგებობათა ს/კ ინსტიტუტი), ჰიდროტექნიკურ ნაგებობათა კვლევის განყოფილებაში უფროს ინჟინრად, უმცროს მეცნიერ-თანამშრომლად, ჯგუფის ხელმძღვანელად, წამყვან მეცნიერ-თანამშრომლად, განყოფილების გამგის მოადგილედ, ლაბორატორიის სექტორის გამგის თანამდებობაზე; 1970 წლიდან იყო ინსტიტუტის სამეცნიერო საბჭოსა და სექციის წევრი; დაამთავრა ამავე ინსტიტუტის ასპირანტურა; 1975 წელს დაიცვა საკანდიდატო დისერტაცია; 2005 წელს მიენიჭა აკადემიური დოქტორის ხარისხი; სამეცნიერო საქმიანობასთან ერთად, შეთავსებით, ეწეოდა ნაყოფიერ პედაგოგიურ მოღვაწეობას საქართველოს პოლიტექნიკური ინსტიტუტის ჰიდროტექნიკურ ნაგებობათა კათედრაზე- 1987 წლიდან ჯერ საათობრივი დატვითვით, 1991 წლიდან საქართველოს ტექნიკური უნივერსიტეტის ჰიდროსაინჟინრო დეპარტამენტის პედაგოგ-დოცენტის თანამდებობაზე; 2006 წლიდან მუშაობს ასოცირებული პროფესორის თანამდებობაზე; მისი სამეცნიერო კვლევების ძირითადი მიმართულებებია: ჰიდროტექნიკურ ნაგებობათა დაძაბულ-დეფორმირებული მდგომარეობისა და სიმტკიცეზე მარაგის კოეფიციენტის დადგენა, მათი ოპტიმალური კონსტრუქციის, ფორმის, ზომების განსაზღვრა; მშენებლობის ტექნოლოგიის საკითხების დამუშავება და დანერგვა; მისი მონაწილეობით შედგენილია ნორმატიული დოკუმენტები, რომლებიც დანერგილია ჰიდროტექნიკური მშენებლობის სფეროში, დიდი ეკონომიკური ეფექტით; გამოქვეყნებული აქვს 79 სამეცნიერო-კვლევითი სტატია, თანაავტორი და ხელმძღვანელია 99 სამეცნიერო-ტექნიკური ანგარიშის; შედგენილი აქვს სალექციო კურსები 4 ძირითად საგანში, რომელთა მიხედვითაც ასწავლიან ჰიდროტექნიკური ნაგებობების სპეციალობის სტუდენტებს და მაგისტრანტებს; იყო ქ. თბილისის ყოფილი არქიტექტურისა და მშენებლობის ინსტიტუტის პრორექტორი სასწავლო ნაწილში, კითხულობდა ლექციებს "მშენებლობის ტექნოლოგიის, ორგანიზაციისა და მართვის" კათედრაზე; მისი ბიოგრაფიული, სამეცნიერო და პედაგოგიური საქმიანობის მონაცემები შესულია ენციკლოპედიაში "საქართველოს ენერგეტიკოსები"; მრავალწლიანი სამეცნიერო-პედაგოგიური მოღვაწეობისა და დამსახურებისათვის მიღებული აქვს სახელმწიფო და საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 312-313

• საქართველოს ენერგეტიკის აკადემია, აკადემიკოსი (2009-)