ზურაბ ხინიკაძე

დაბადების ადგილი: ქ. ქობულეთი.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1975 წელს.

1975-1977წწ. მუშაობდა საქართველოს სასოფლო მშენებლობის სამინისტროს ტრესტ "საქსოფმშენინდუსტრიის" სისტემაში ინჟინრად; 1977-1985წწ.  "საქმთავარკოლმშენის" ქობულეთის რაიონის საკოლმეურნეობათაშორისო სამშენებლო ორგანიზაციაში მშენებელ-ოსტატად, სამუშაოთა მწარმოებლად, საწარმოო-ტექნიკური განყოფილების უფროსად, მთავარ ინჟინრად; 1985 წელს გადაიყვანეს საქართველოს კომპარტიის ქობულეთის რაიონული კომიტეტის ინსტრუქტორად, სადაც მუშაობდა 1990 წლამდე; 1990-1992წწ. საქართველოს სახელმწიფო აგროსამრეწველო კომიტეტის "საქარაგრომრეწვი"-ს №2 სამშენებლო-სარემონტო ტრესტის ქობულეთის სამშენებლო-სარემონტო სამმართველოს მთავარ ინჟინრად; 1993-2005წწ. ინდივიდუალური ბინათმშენებლობის კერძო სამშენებლო სამმართველოში სამუშაოთა მწარმოებლად; 2005 წლიდან მუშაობს სამშენებლო კომპანია "ანაგის" სამუშაოთა მწარმოებლად; მისი უშუალო მონაწილეობითა და ხელმძღვანელობით აშენდა მრავალი სასოფლო-სამეურნეო დანიშნულების საწარმოო და ინფრასტრუქტურული ობიექტი და რიგი კერძო საცხოვრებელი სახლი ქობულეთის რაიონში, სასტუმრო "საქართველო" ქ. ქობულეთში, საჯარო სკოლის შენობა სენაკის რაიონის სოფ. ნოქალაქევში, სასტუმრო-საცხოვრებელი კომპლექსი კაჩინსკის ქუჩაზე ქ. ბათუმში და სხვა; მრავალწლიანი შრომითი საქმიანობისა და დამსახურებისათვის მიღებული აქვს საუწყებო ჯილდოები და საპატიო სიგელები.

წყარო: საქართველოს არქიტექტორთა და მშენებელთა ენციკლოპედია. წიგნი 2. -თბ., 2021. -გვ. 324