დომენტი ოყრეშიძე

დაბადების ადგილი: სოფელი ჭოლევი, წყალტუბოს რაიონი.

დაამთავრა ქუთაისის სასულიერო სასწავლებელი და ხონის სამასწავლებლო სემინარია.

პირველი წერილი 1896 წელს ჟურნალ "კვალში" გამოაქვეყნა, პირველი ლექსი - ჟურნალ "ჯეჯილში" ამავე წელს. 1898 წლიდან სახალხო მასწავლებლად მუშაობდა სამეგრელოსა და ქვემო იმერეთში წერა-კითხვის გამავრცელებელი საზოგადოების სკოლებში, ხოლო 1911 წლიდან ენისა და ლიტერეტურის მასწავლებლად ქართულ გიმნაზიაში. 1912 წლიდან ცხოვრობდა და მოღვაწეობდა ქუთაისში. მეფის მოხელეების დევნის მიუხედავად ქართული გიმნაზიის მასწავლებლები დაუღალავად იღწვოდნენ მოსწავლე-ახალგაზრდობაში ღრმად დაენერგათ ეპოქის მოწინავე იდეები, მშობლიური ენისა და კულტურისადმი სიყვარული. თანამშრომლობდა გაზეთებში: "ივერია", "ახალი დროება", "სახალხო გაზეთი", "ისარი", "ამირანი" და სხვ. თავის ლექსებში, რომლებზეც დიდი გავლენა მოახდინა აკაკი წერეთლის პოეზიამ, მან გამოხატა საერთო სახალხო მისწრაფება თვითმპყრობელობის უღლიდან განთავისუფლებისაკენ, მებრძოლი განწყობილება, ქედუხრელობა, მომავლის რწმენა ("სიმღერა", 1901; "მოლოდინში", გამარჯვება", 1905; "მეგობარს", 1906; "გაზაფხულდა?!", 1910; "ასე ერთხმად", 1915 და სხვ.). მისი პოეზია ეხმაურებოდა ახალი საქართველოს ცხოვრებას, დიდ სამამულო ომს, მშვიდობიან მშენებლობას ("სიმღერა", 1929; "სამშობლოსადმი", 1937; "ქართველ მეომრებს", "წერილი ბრძოლის ველიდან", 1962 და სხვ.). ავტორია საბავშვო პოემებისა "შავი ცხვარი" და "ბერიკა ლევისარაშვილი" (1950-1951).

წყარო: ქართული საბჭოთა ენციკლოპედია: ტ.7.-თბ., 1984.-გვ.619

• ქართველთა შორის წერა-კითხვის გამავრცელებელი საზოგადოება, საზოგადოების ნამდვილი წევრი (1907-)
• ქართველთა შორის წერა-კითხვის გამავრცელებელი საზოგადოება, ქუთაისის განყოფილების წევრი (1916-)

• 1939 - საქართველოს დამსახურებული მასწავლებელი
• საპატიო ნიშნის ორდენი

• რჩეული : ლექსები. პოემები (ავტორი). - თბილისი, მერანი, 1977. - 245გვ.
• ლექსები (ავტორი). - თბილისი, სახელგამი, 1955. - 178გვ.
• შავი ცხვარი : საბავშვო პოემა (ავტორი). - თბილისი, საბლიტგამი, 1944. - 19გვ.
• ლექსთა კრებული (ავტორი). - თბილისი, ფედერაცია, 1939. - 186გვ.
• საყმაწვილო მოთხრობები (ავტორი). - ქუთაისი, ი. ხეთერელის წიგნის მაღაზიის გამოცემა, 1903. - 38გვ.