კონსტანტინე კანდელაკი

დაბადების ადგილი: ქ. ქუთაისი.

დაამთავრა იურიევის (ტარტუს) უნივერსიტეტის ფიზიკა-მათემატიკის ფაკულტეტი 1912 წელს.

1913 წლამდე მუშაობდა მასწავლებლად. იყო ქუთაისის პოლიტექნიკური ინსტიტუტის სასწავლო ნაწილისა და საექსტერნო კურსების გამგე. შეადგინა ფიზიკის, მათემატიკისა და ასტრონომიის 13 სასკოლო სახელმძღვანელო. მე-20 საუკუნის დასაწყისში ქართულ სკოლებში ყველა სასწავლო დისციპლინა რუსულ ენაზე ისწავლებოდა. საქართველოს მთავრობამ ჩამოაყალიბა სამეცნიერო საბჭო, რომელსაც დაევალა ქართულენოვანი ორიგინალური სახელმძღვანელოების შექმნა ყველა საგანში. ტექნიკურ დისციპლინებში სახელმძღვანელოების შედგენა აკადემიკოს ნიკო მუსხელიშვილსა და კონსტანტინე კანდელაკს დაევალა. მრავალწლიანი დაუღალავი შრომის შედეგად მეცნიერებათა აკადემიამ დაამტკიცა კონსტანტინე კანდელაკის მიერ შექმნილი პირველი ქართული სახელმძღვანელოები. დაახლოებით, 50-იან წლებიდან 60-იან წლებამდე ყველა ქართულ სკოლაში ისწავლებოდა კონსტანტინე კანდელაკის მიერ შექმნილი ორიგინალური, ქართული სახელმძღვანელოებით. თუმცა, თავად კონსტანტინეს საკუთარი შრომის შედეგი არ უნახავს, თავდაუზოგავი მუშაობის შედეგად მას მხედველობის ნერვის ატროფია განუვითარდა და  მხედველობა დაკარგა, კონსტანტინე კანდელაკი სამი წელი გადიოდა მკურნალობას გერმანიის წამყვან კლინიკებში და მოახერხეს მხოლოდ ის, რომ სიბრმავისგან იხსნეს - გრძნობდა მხოლოდ დღის სინათლეს. კონსტანტინე კანდელაკის ნაშრომი ხელნაწერები ინახება ქუთაისის ეთნოგრაფიულ მუზეუმში. პირველი ქართულენოვანი სასკოლო, ტექნიკური დისციპლინების (მათემატიკა, ფიზიკა, ასტრონომია) შემქმნელი. 

წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.541; უცნობი ქუთაისი: m.facebook.com

• საქართველოს უსინათლოთა საზოგადოების ქუთაისის განყოფილება, თავმჯდომარე (1936-)

• მედალი "1941-1945 წლებში დიდ სამამულო ომში მამაცური შრომისთვის"

• დაწყებითი ასტრონომია (ავტორი). - ტფილისი, სახელგამის გა-მა, (1-ლი სტ.), 1932. - 169გვ.
• ფიზიკა (ავტორი). - ტფილისი, სახელგამი, 1931. - 240გვ.
• ალგებრულ ამოცანათა კრებული : სახელმძღვ. შრომის სკოლებისათვის (ავტორი). - ქუთაისი, ადგილობრივი მეურნეობის სტამბა, 1925. - 142გვ.
• პრაკტიკული გეომეტრია : ქართული სახალხო სკოლებისათვის (ავტორი). - ქუთაისი, "მომავალი"-ს გამოცემა, (სამაზრო ერობის სტ.), 1920. - 68გვ.