ვალერიან იმნაიშვილი

დაბადების ადგილი: ქ. ბათუმი.

დაამთავრა ბათუმის საზღვაოსნო სასწავლებლის გემთწამყვანი ფაკულტეტი 1973 წელს; ნოვოროსიისკის უმაღლესი საზღვაო - საინჟინრო სასწავლებელი (НВИМУ) ინჟინერ-გემთწამყვანის აკადემიური ხარისხითა და შორეული ნაოსნობის შტურმანის სპეციალობით 1985 წელს.

1973 წლიდან საქართველოს საზღვაო სანაოსნოს გემებზე გაიარა ყველა საფეხური რიგითი მატროსობიდან შორეული ნაოსნობის კაპიტნობამდე. ასრულებდა კაპიტნის მე-4, მე-3, მე-2 და უფროსი თანაშემწის მოვალეობებს; 1975 წელს მან დაუსწრებლად განაგრძო სწავლა ნოვოროსიისკის უმაღლეს საზღვაო - საინჟინრო სასწავლებელში (НВИМУ); 1985 წელს, იმდროინდელი საზღვაო ფლოტის სამინისტროს კოლეგიამ ვალერიან (პაატა) იმნაიშვილი შორეული ნაოსნობის კაპიტნად დაამტკიცა, რის შემდეგაც მას საქართველოს საზღვაო სანაოსნოს არაერთი გემის, ძირითადად თხევადი ტვირთების გადამტანი ტანკერების ეკიპაჟების მეთაურობა მოუწია; 1991 წელს უკვე გამოცდილმა კაპიტანმა საქმიანობა მენეჯერად და სუპერინტენდანტად ერთობლივ სანაოსნო კომპანია «ANGLO-GEORGIAN SHIPPING»-ში განაგრძო; 1994 წლიდან იმყოფება საჯარო სამსახურში და საქართველოს ეკონომიკური განვითარების სამინისტროსთან ახლადშექმნილი საზღვაო ტრანსპორტის ადმინისტრაციის იურიდიულ - სამართლებრივ და საგარეო ურთიერთობათა დეპარტამენტს ხელმძღვანელობს; 2007-2010 წლებში იყო ამავე ადმინისტრაციის გემების რეგისტრაციისა და სახელმწიფო დროშის კონტროლის სამსახურის უფროსი; 2012 წლიდან დღემდე ბათუმის ნავიგაციის სასწავლო უნივერსიტეტის ასოცირებული პროფესორი და საერთაშორისო საზღვაო სამართლის სპეციალისტია; არის არაერთი საერთაშორისო საზღვაო ფორუმის, კონფერენციისა და პროექტის მონაწილე, საზღვაო თემატიკაზე გამოქვეყნებული კვლევის, სამეცნიერო ნაშრომის, სასწავლო სახელმძღვანელოს, პუბლიკაციისა და სტატიის ავტორი. შორეული ნაოსნობის კაპიტანი.

წყარო: პაატა ტაბაღუას საავტორო გვერდი: "საქართველო საზღვაო ქვეყანაა": facebook.com