ბესარიონ კელენჯერიძე

დაბადების ადგილი: სოფელი ტაბაკინი, ზესტაფონის რაიონი.

დაამთავრა ქუთაისის სასულიერო სასწავლებელი 1881 წელს, ქუთაისის პროგიმნაზია და გიმნაზიის 7 კლასი.

სიღარიბის გამო მე-8 კლასიდან გამოვიდა. მოიპოვა სახალხო მასწავლებლის წოდება და 1885 წლიდან მასწავლებლობდა ზესტაფონის სხვადასხვა სკოლაში და სამოქალაქო სასწავლებელში. 1890-იანი წლებიდან დაუახლოვდა ეგნატე ნინოშვილს, მასთან ერთად მუშაობდა და იყო მისი უახლოესი მეგობარი (ებარა რევოლუციონერ მუშაკთა დასახმარებლად შეგროვილი თანხის საიდუმლო სალარო). 1896-1900 წლებში ხშირად იწვევდნენ მასწავლებელთა გადასამზადებელ კურსებზე მათემატიკასა და რუსულ ენაში (წერა) საჩვენებელი გაკვეთილების ჩასატარებლად. მონაწილეობდა "ქართველთა შორის წერა-კითხვის გამავრცელებელი საზოგადოების" საქმიანობაში. ბესარიონ კელენჯერიძის თაოსნობით ზესტაფონში გაიხსნა ლიტერატურით მდიდარი წიგნთსაცავ-სამკითხველო, იგი იყო შენობის ამგები კომისიის წევრი და მუშაობდა სრულიად უსასყიდლოდ. 1900-1905 წლებში მონაწილეობდა ზესტაფონის თეატრის მშენებლობაში. 1907-1916 წლებში, თავმჯდომარეობდა ზესტაფონის ქალთა და ვაჟთა გიმნაზიების დაარსებას. 1917 წელს, პირადი დანაზოგიდან გადასცა 600 მანეთი, თავისუფალი შემოწირულობის სახით შეკრიბა 70.000 მანეთი, ასევე მონაწილეობდა მრავალი სკოლისა და სამკითხველოს დაარსებაში. 1922-1928 წლებში იყო ქალაქის საბჭოს აქტიური წევრი, აქვეყნებდა აღმზრდელობითი ხასიათის ლექსებსა და წერილებს რაიონულ გაზეთ "ლენინელში". 1932-1935 წლებში ფერომარგანეცის მუშებს ასწავლიდა წერა-კითხვას. 1935-1936 წლებში მუშაობდა ზესტაფონის მოზრდილთა საშუალო ათწლედში მასწავლებლად და საზოგადო-კულტურულ საქმიანობასაც ხელმძღვანელობდა. 

წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.619

• ქართველთა შორის წერა-კითხვის გამავრცელებელი საზოგადოების ყვირილას განყოფილება, წევრი (1911-)
• ქართველთა შორის წერა-კითხვის გამავრცელებელი საზოგადოების ყვირილას განყოფილების გამგეობა , წევრი (1915-)

• 1946 - საქართველოს დამსახურებული მასწავლებელი
• შრომის წითელი დროშის ორდენი