სიმონ კიწმარიშვილი

დაბადების ადგილი: სოფელი ბჟოლიეთი, ჩოხატაურის რაიონი.

1917 წლიდან მუშაობდა თბილისის სადგურში, 1921 წლიდან ბათუმის სანაპირო არტელში. 1928 წლიდან იყო  სადგურის გაერთიანებული ფაბკომის ხელმძღვანელი. 1928-1929 წლებში საქართველოს საფეიქრო ტრესტმა კვალიფიკაციის ასამაღლებლად მოსკოვში გააგზავნა, დაბრუნების შემდეგ მუშაობდა თბილისის მაუდის ქარხანაში ბრიგადის ხელმძღვანელად და საწარმოო კომისიის თავმჯდომარედ. 1931 წლამდე წარმოების გაუმჯობესების მიზნით ქარხანაში 30-მდე წინადადება შეიტანა, გამოიგონა ხუთი მანქანა-დანადგარი: მზა საქონლის დამკეცი, გამზომი და გამხვევი, მექანიკური შემმოწმებელი, გასაწური მანქანის სამკლავის მცვლელი და საშრობი მანქანის გამწმენდის გამმარტივებელი. დააპატიმრეს 1937 წლის 2 თებერვალს, დახვრიტეს 1937 წლის 14 სექტემბერს. სსრკ უზენაესი სასამართლოს სამხედრო კოლეგიის 28/11-1957 წ. №4н-07013/57 განჩინებით საქმე შეწყდა დანაშაულის ნიშნების არარსებობის გამო. რეპრესირებული.

წყარო: ქართველ მოღვაწეთა ლექსიკონი, 1801-1952: ტ. II ე-ლ / იოსებ იმედაშვილი.-თბ.,2021.-გვ.699; საქართველოს პარლამენტის ეროვნული ბიბლიოთეკა : სტალინური სიები საქართველოდან: nplg.gov.ge