ალექსანდრე თაყაიშვილი

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტის გეოლოგიის ფაკულტეტი ნავთობისა და გაზის გეოლოგიისა და ძიების სპეციალობით და მიიღო სამთო ინჟინერ-გეოლოგის კვალიფიკაცია.

ინსტიტუტში სწავლის პერიოდში მუშაობდა გეოლოგიური სამმართველოს კომპლექსურ გეოლოგიურ-გეოფიზიკურ ექსპედიციაში გეოლოგიური აგეგმვის პარტიაში, სადაც გაიარა ყველა თანამდებობრივი საფეხური მუშიდან უფროსი გეოლოგის თანამდებობამდე. 1976 წლიდან - "საქნავთობის" ნავთობ-გაზმომპოვებელი სამმართველო, მოპოვების ინჟინერ-ტექნოლოგი, შემდგომ გეოლოგიურ-გეოფიზიკური ლაბორატორია, უფროსი ინჟინერი; 1978 წლიდან - ჩრდილო კავკასიის სამეცნიერო-კვლევითი და საპროექტო ინსტიტუტის საქართველოს ფილიალის ლაბორატორია, უფროსი ინჟინერი, უფროსი მეცნიერ-თანამშრომელი; 1986-1995წწ. - "საქნავთობი", გეოლოგიური განყოფილების უფროსი; 1992-1995წწ. - ქართულ-ბრიტანული ნავთობის კომპანია, გეოლოგ-კონსულტანტი; 1995 წლიდან - შპს "იორის ველი ნავთობი და გაზი", მთავარი გეოლოგი. გამოქვეყნებული აქვს 30-მდე ნაშრომი, რომლებიც ძირითადად ეხება მარაგების ანგარიშის მეთოდოლოგიას და თბილისისპირა ნავთობგაზიან რაიონში გავრცელებულ ნავთობშემცველ კოლექტორებს. მონაწილეობდა აშშ-ს სამხრეთ კაროლინის უნივერსიტეტის,  EZRI-ს ინსტიტუტის მიერ შესრულებულ სამეცნიერო ნაშრომში, რომელშიც განხილულია საქართველოს ყველა ნავთობგაზიანი რაიონი და მათი პერსპექტივები.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.142-143