გიორგი თხინვალელი

დაბადების ადგილი: სოფელი მჭადიჯვარი, დუშეთის მაზრა.

დაამთავრა თბილისის პირველი ტექნიკუმი 1923 წელს; ლენინგრადის ტექნოლოგიური ინსტიტუტი 1930 წელს და მიიღო ჰიდრავლიკური ძრავების სპეციალისტის კვალიფიკაცია.

მუშაობდა ლენინგრადის მეტალურგიული ქარხნის წყლის ტურბინების ბიუროში კონსტრუქტორად. იქვე გააგრძელა მუშაობა ინსტიტუტის დამთავრების შემდეგ; 1933-1935წწ. ხელმძღვანელობდა სადიპლომო დაპროექტებას და კითხულობდა ლექციების კურსს ლენინგრადის პოლიტექნიკურ ინსტიტუტში; 1935 წელს - ხრამჰესმშენის სამმართველოს ინჟინერი, ელექტრომექანიკური განყოფილების უფროსი ინჟინერი; 1936 წლიდან - ზაჰესის მე-6 აგრეგატის მონტაჟის უფროსი; 1938 წლიდან - საქმთავარენერგოს ტექნიკური განყოფილების უფროსი ინჟინერი; 1945-1948წწ. იყო თბილისის 26 კომისართა სახელობის ქარხნის ჰიდროტურბინების საკონსტრუქტორო ბიუროს უფროსი, სადაც მისი ხელმძღვანელობით, პირველად საქართველოში, განხორციელდა მის მიერ შემოთავაზებული მცირე სიმძლავრის რეაქტიული კლასის ტურბინების წარმოება და ექსპლუატაციაში შეყვანა (მცირე სერია); 1947-1967წწ. - საქართველოს ნაგებობათა და ჰიდროენერგეტიკის სამეცნიერო-კვლევითი ინსტიტუტის მეცნიერ-თანამშრომელი, უფროსი მეცნიერ-თანამშრომელი, ლაბორატორიის გამგე; 1951 წელს ლენინგრადში დაიცვა საკანდიდატო დისერტაცია; 1967-1988წწ. - მუშაობდა საქართველოს პოლიტექნიკური ინსტიტუტის "ჰიდრავლიკისა და ჰიდრომანქანების" კათედრაზე, 1967-1982წწ. - დოცენტი, 1982-1988წწ. - პროფესორი; 1949-1954წწ. იყო ჰესების საექსპლუატაციოდ ჩაბარების სამთავრობო კომისიების ჰიდრომექანიკური სექციის თავმჯდომარე. მისი სამეცნიერო და საინჟინრო მოღვაწეობის სფეროებია: ჰიდროტურბინების მუშაობის ეფექტურობის ამაღლება, ჰიდროენერგეტიკული მოწყობილობების შერჩევა, ჰიდროაგრეგატების ტექნიკური მდგომარეობის კვლევა, ჰიდროტურბინების მოწყობილობების მონტაჟი, მცირე სიმძლავრის ჰიდროტურბინების დაგეგმარება, ჰიდროტურბინების მოდელური გამოკვლევა, ნატურული გამოკვლევები, ცვეთის პრობლემების შესწავლა. 60-ზე მეტი სამეცნიერო ნაშრომის ავტორი, მათ შორის, 2 სახელმძღვანელო და 2 დამხმარე სახელმძღვანელო. მისი ხელმძღვანელობით შესრულდა მრავალი სამეცნიერო გამოკვლევა.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.150-151

• ჰიდრავლიკური მანქანები : სახელმძღვანელო პოლიტექნ. ინ-ტის სტუდენტებისათვის (ავტორი) // ნაწ. 2, ტუმბოები და შექცევადი ჰიდრომანქანები . - თბილისი, განათლება, 1982. - 111გვ.
• ჰიდრავლიკური მანქანები : სახელმძღვანელო პოლიტექნ. ინ-ტის სტუდენტებისათვის (ავტორი) // ნაწ. 1, ჰიდრავლიკური ტურბინები . - თბილისი, განათლება, 1978. - 282გვ.