ბოგდან ნიგურიანი

დაბადების ადგილი: ქ. მესტია.

დაამთავრა საქართველოს სახელმწიფო ფიზიკური კულტურის ინსტიტუტი.

სკოლის დამთავრების შემდეგ სწავლობდა თბილისის ელექტროტექნიკურ სასწავლებელში; 1967 წელს გაიწვიეს სავალდებულო სამხდრო სამსახურში და ჯარიდან დაბრუნების შემდეგ სწავლა განაგრძო საქართველოს სახელმწიფო ფიზიკური კულტურის ინსტიტუტში; სწავლის პერიოდში ეწეოდა მთამსვლელობას, საქართველოს სახელით მონაწილეობდა ჩემპიონატებში კლდეზე ცოცვასა და ალპინიზმში; არის შეიარაღებული ძალების რამდენიმე გზის ჩემპიონი და პრიზიორი; მონაწილეობდა საერთაშორისო მთამსვლელ მოთხილამურეებთან ერთად მწვერვალ იალბუზიდან თხილამურებით დაშვებაში; 1972-2005წწ. მონაწილეობდა და ხელმძღვანელობდა სამაშველო სამსახურს; აღნიშნულ წლებში ჯგუფმა კავკასიონის მწვერვალებიდან და უღელტეხილებიდან ჩამოასვენა 25 დაღუპული და 30-მდე გადარჩენილი სხვადასხვა ქვეყნის ტურისტები; შესრულებული აქვს უმაღლესი კატეგორიის ასვლები კავკასიონზე, მინიჭებული აქვს უფროსი ინსტრუქტორის წოდება, როგორც ალპინიზმში და ტურიზმში, ასევე სამთო სათხილამურო სპორტში. არის სპორტის ოსტატი ალპინიზმში, სამთო-სათხილამურო სპორტში და მინიჭებული აქვს სპორტის დამსახურებული მუშაკის წოდება. მისი უშუალო მონაწილეობით დაარსდა მიხეილ ხერგიანის სახლ-მუზეუმი, რომლის დირექტორადაც წლების განმავლობაში  მუშაობდა და რომელსაც ტურისტები დიდი ინტერესით ეცნობიან. მთამსვლელი, საბჭოთა კავშირის მრავალგზის ჩემპიონი.

წყარო: სვანეთი და სვანები / ირაკლი დვალი, გივი ქურდიანი.-თბ., 2014.-გვ.275

• საბჭოთა კავშირის მრავალგზის ჩემპიონი
• საპატიო ნიშნის ორდენი
• სპორტის ოსტატი
• სპორტის დამსახურებული მუშაკი