ვახტანგ კობახიძე

დაბადების ადგილი: ქ. თბილისი.

დაამთავრა საქართველოს პოლიტექნიკური ინსტიტუტი 1972 წელს, მდინარის ნაგებობათა და ჰიდროელექტროსადგურების მშენებლობის სპეციალობით და მიენიჭა ინჟინერ-მშენებლის კვალიფიკაცია.

1972-1975წწ. - "თბილჰიდროპროექტის" ენგურჰესის მიწისქვეშა საგენერატორო შენობის დაპროექტების ჯგუფის ინჟინერი; 1975 წლიდან - "საქმთავარენერგოს" ჰიდროტექნიკური სამსახურის ინჟინერი, სამსახურის უფროსის მოადგილე. აქტიურად მონაწილეობდა ვარციხეჰესების კასკადის, ენგურჰესის, ჟინვალჰესის, რუსთავის ახალი კაშხლის (თბილსრესის წყალმომარაგების სისტემა) სახელმწიფო კომისიების მუშაობაში. 1980-იან წლებში მისი ინიციატივით შეიქმნა წყალქვეშა ჰიდროტექნიკური ნაგებობების კვლევისა და ტექნიკური მომსახურების კომპანია, რომელმაც დიდი მოცულობის სამუშაოები შეასრულა საქართველოს ენერგოსისტემაში შემავალი ჰესების საიმედო და უავარიო მუშაობისათვის. 1988-1990წწ. - ამიერკავკასიის გაერთიანებული ენერგოსისტემების სადისპეტჩერო სამმართველოს ენერგეტიკული რეჟიმების სამსახურის უფროსის მოადგილე ამიერკავკასიის ჰესების მუშაობის რეჟიმების დაგეგმვისა და მართვის განხრით; 1991-1992წწ. - საქართველოს ენერგეტიკის სამინისტროს ტექნიკური ანალიზისა და დაპროექტების სამმართველოს უფროსი; 1992 წლიდან - სსიპ "ენერგოგენერაციის" ჰიდროტექნიკური განყოფილების უფროსი; 2000-2005წწ. - გუმათჰესების კასკადის დირექტორი; 2005-2007წწ. - საქართველოს ენერგეტიკის სამინისტროს მთავარი სპეციალისტი. მისი მონაწილეობით შესრულდა სარეაბილიტაციო სამუშოები მოქმედი ჰესების ჰიდროტექნიკურ ნაგებობებზე. დამუშავდა მთელი რიგი პროექტები აღდგენითი და სარეკონსტრუქციო სამუშაოების შესასრულებლად. 2007 წლიდან - საპროექტო-საძიებო და სამეცნიერო-კვლევითი ინსტიტუტის "ჰიდროპროექტის" დირექტორი.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.173-174