ნინო გამყრელიძე-მაჭავარიანი

დაბადების ადგილი: სოფელი აწყური (ყოფილი თელავის მაზრა), თელავის მუნიციპალიტეტი.

1899-1905 წლებში სწავლობდა თელავის წმინდა ნინოს სასწავლებელში.

1909 წლიდან ნინო გამყრელიძე სხვადასხვა სკოლებში ასწავლიდა ქართულ ენასა და ლიტერატურას, მათემატიკას, რუსულ ენასა და ლიტერატურას; 1940 წლიდან ლექციებს კითხულობდა თელავის სამასწავლებლო ინსტიტუტში (ახლანდელი თელავის იაკობ გოგებაშვილის სახელმწიფო უნივერსიტეტი). ნინო გამყრელიძე ცოლად გაჰყვა სოლომონ მაჭავარიანს, რომელსაც დამთავრებული ჰქონდა ელიზავეტგრადის საკავალერიო სასწავლებელი; სოლომონ მაჭავარიანი მსახურობდა უნგრეთის ულანთა მერვე პოლკში კორნეტად (1908), პორუჩიკად (1911), შტაბს-როტმისტრად (1914); ამ წოდებით მონაწილეობდა იგი I მსოფლიო ომში, სადაც იბრძოდა გერმანიის (1914-1916), ავსტრიისა და რუმინეთის (1916-1917),  სპარსეთის (1917) ფრონტებზე. 1917 წლიდან იგი ცხენოსანთა I ესკადრონს მეთაურობდა. სოლომონ მაჭავარიანს 1919 წელს საქართველოს დემოკრატიული რესპუბლიკის მთავრობამ პოდპოლკოვნიკის წოდება მიანიჭა; გენერალ ჭავჭავაძის პოლკის ესკადრონის მეთაურის რანგში მონაწილეობდა ბარცაალთან ოსმალებთან მომხდარ ბრძოლაში. დახვრიტეს 1924 წელს თელავში, "გიგოს გორაზე". ნინო გამყრელიძე-მაჭავარიანი 1924 წლის აგვისტოს მოვლენების შესახებ დიდი სიფრთხილით საუბრობდა. იგი თითქმის 60 წელი ეწეოდა პედაგოგიურ მოღვაწეობას. 

წყარო: ქალთა განათლების კერები თელავში / მარინე გოგბაიძე, გიორგი ჯავახიშვილი.- თბ., 2020.-გვ.52