კაკო პეტრიაშვილი

დაბადების ადგილი: სოფელი ზემო ბარი, ონის რაიონი.

დაამთავრა მოსკოვის ენერგეტიკის ინსტიტუტის ინჟინერ-ელექტრიკოსის კვალიფიკაციით.

1953-1957წწ. მუშაობდა აზერბაიჯანში მინგეჩაურის ჰესის ელექტროსაამქროში უფროს ინჟინრად, მორიგე ინჟინრად, ცვლის უფროსად; 1957 წელს დაბრუნდა საქართველოში და მუშაობა დაიწყო "საქენერგოს" სადისპეტჩერო სამსახურში დისპეტჩერის თანაშემწედ, შემდეგ დისპეტჩერად, უფროს დისპეტჩერად. ამავდროულად სწავლობდა ასპირანტურაში. 1962 წელს სსრკ ენერგეტიკის სამინისტროს გადაწყვეტილებით დაინიშნა ამიერკავკასიის გაერთიანებული სადისპეტჩერო სამმართველოს მმართველის მოადგილე-მთავარ დისპეტჩერად; 1967 წლიდან მმართველად. მისი თაოსნობითა და ძალისხმევით სამმართველოსთან შეიქმნა საკავშირო მნიშვნელობის გამოთვლითი ცენტრი, აღჭურვილი უახლესი ტექნოლოგიებითა და პროგრამებით, აშენდა ადმინისტრაციული შენობა, გაუმჯობესდა თანამშრომელთა სოციალური პირობები. განსაკუთრებით მნიშვნელოვანია მისი ღვაწლი კადრების მომზადებასა და დაწინაურების საქმეში. საქართველოს დამოუკიდებლობის დასაწყისიდან გენერალური დირექტორის სტატუსით ხელმძღვანელობდა იგივე კოლექტივს, რომელსაც სს "პონტოელის" სახელი მიენიჭა. 1990-იან წლებში იყო შავი ზღვის ქვეყნების ეკონომიკური განვითარების ენერგეტიკული სექტორის მუშა ჯგუფის წევრი. დაჯილდოებულია მთავრობისა და საკავშირო ენერგეტიკის სამინისტროს მრავალი ჯილდოთი.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.283

• საქართველოს დამსახურებული ინჟინერი