ვალია ხაზალია

დაბადების ადგილი: ქ. ზუგდიდი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1941 წელს.

1941 წელს სწავლა განაგრძო შოთა რუსთაველის სახელობის ქართული ლიტერატურის ინსტიტუტის ასპირანტურაში ახალი ქართული ლიტერატურის ისტორიის განყოფილებაზე (ხელმძღ. პროფესორი შალვა რადიანი); დასრულებული სადისერტაციო ნაშრომი − "ვაჟას ესთეტიკა" ხელნაწერი საბჭოთა კავშირის მებაჟეებმა სასაზღვრო გამშვებ პუნქტზე 1948 წელს ჩამოართვეს, როდესაც ბელგიაში მიემგზავრებოდა, საბჭოთა კავშირის საელჩოს დიპლომატ, გივი მელაძეზე დასაქორწინებლად; 1948-1951 წლებში ბელგიაში ცხოვრობდა, საბჭოთა კავშირის საელჩოში პერიოდულად, მთარგმნელობით საქმიანობას ეწეოდა; 1951 წელს სამშობლოში დაბრუნდა; მომდევნო რამდენიმე წლის განმავლობაში თანამშრომლობდა ილია ჭავჭავაძის სახელობის უცხო ენათა სახელმწიფო პედაგოგიურ ინსტიტუტთან და სხვადასხვა სამეცნიერო-კვლევით დაწესებულებასთან; თარგმნიდა ფრანგულენოვან სამეცნიერო პუბლიკაციებსა და კვლევით ნაშრომებს; ორმოცდაათიანი წლების მეორე ნახევრიდან საქართველოში ტელევიზიის დაარსების სათავეებთან იდგა; 1956 წლის 30 დეკემბერს იყო პირველი სატელევიზიო გადაცემის პასუხისმგებელი რედაქტორი; 1957-1959 წლებში უძღვებოდა სატელევიზიო ლიტერატურულ ჟურნალს; 1959-1962 წლებში საფრანგეთში (პარიზი) ახლდა მეუღლეს, რომელიც იუნესკოს სსრკ-ს წარმომადგენლობაში პირველი მდივნის დიპლომატიურ რანგში მუშაობდა. თავად ამავე პერიოდში დაამთავრა სორბონის უნივერსიტეტის ლიტერატურისა და ჰუმანიტარულ მეცნიერებათა ფაკულტეტი; სორბონის უნივერსიტეტის პროფესორის, პიერ ფუშეს  უშუალო ხელმძღვანელობით, სწავლობდა ფრანგული ენის ფონეტიკის ინსტიტუტში, რომელიც ვერ დაამთავრა მეუღლის დიპლომატიური მისიის ამოწურვისა და სამშობლოში დაბრუნების გამო; 1963 წელს მუშაობა განაგრძო საქართველოს ტელევიზიის პირველ არხზე, სადაც ოთხი ათეული წლის განმავლობაში სახვითი ხელოვნების პროგრამების ჯგუფის უფროსი იყო და მის სახელს უკავშირდება ტელეეთერით ქართული სახვითი და გამოყენებითი ხელოვნების პოპულარიზაცია; მისი ავტორობითა და რედაქტორობით მზადდებოდა გადაცემათა ციკლი: "ვერნისაჟი", "სტუმრად სახელოსნოში", "შემოქმედებითი პორტრეტი", "საკვირაო გამოფენა", "მსოფლიო ხელოვნების საგანძური", "რეპორტაჟი გალერეიდან", "საზღვარგარეთ მოღვაწე ქართველი მხატვრები" და სხვა; თანამშრომლობდა ბეჭდურ მედიასთან; ავტორია წერილების ციკლის: "აღიარების დიდი გზა", (ნიკო ფიროსმანი); საქართველოს ტელევიზიაში მუშაობის პარალელურად ეწეოდა სამეცნიერო-კვლევით საქმიანობას; ფრანგული და ქართული ენების ხმოვნებისა და თანხმოვნების შეპირისპირებითი ანალიზის საფუძველზე, საქართველოში იუნესკოს წარმომადგენლობის მხარდაჭერით, ფრანგული ენის შემსწავლელთათვის შექმნა დამხმარე სახელმძღვანელო: "ჩემი რვეულები ფრანგულ ენაში" (ფრანგული და ქართული ენების ორთოგრაფიული და ფონეტიკური ანბანი), რომელიც 2004 წელს გამოიცა. დაჯილდოებულია საფრანგეთის ღირსების დიპლომით, 2002 წელს აშშ-ის ბიოგრაფიათა საერთაშორისო ცენტრმა მიანიჭა "დიდებული ქალბატონის წოდება". სახელმწიფო და საზოგადო მოღვაწის, დიპლომატ გივი მელაძის მეუღლე.

• აშშ-ის ბიოგრაფიათა საერთაშორისო ინსტიტუტის მრჩეველთა კვლევითი საბჭო, წევრი
• საქართველოს მხატვართა კავშირი, წევრი
• საქართველოს ჟურნალისტთა კავშირი, წევრი

• ღირსების ორდენი
• საქართველოს კულტურის დამსახურებული მუშაკი

• ჩემი პირველი რვეულები ფრანგულ ენაში : ფრანგ. და ქართ. ენების ორთოგრაფიული და ფონეტიკური ანბანი (ავტორი) // რვეულები 1 და 2. - თბილისი, საარი, 2004. - 280გვ.