ვიქტორ ტოკაჩიროვი

დაბადების ადგილი: ქ. ფეოდოსია (ყირიმის ოლქი).

დაამთავრა თბილისის რკინიგზის ტრანსპორტის ინჟინერთა ინსტიტუტი ინჟინერ-მშენებლის სპეციალობით 1931 წელს.

1931-1935წწ. მუშაობდა ამიერკავკასიის ნაგებობათა ინსტიტუტში; 1936-1937წწ. - ამიერკავკასიის მუდმივი სამშენებლო გამოფენის განყოფილების გამგე; 1938 წლიდან გარდაცვალებამდე - ნაგებობათა და ჰიდროენერგეტიკის თბილისის სამეცნიერო-კვლევითი ინსტიტუტის თანამშრომელი: ინჟინერი, უფროსი ინჟინერი, მეცნიერ-თანამშრომელი. მონაწილეობდა ხრამჰეს-1-ის, სოხუმჰესის, მინგეჩაურჰესის, ზემო-ყარაბახის სისტემის მიწისქვეშა ნეგებობების გამოკვლევებში. მნიშვნელოვანი ხასიათის ექსპერიმენტული სამუშაოები შეასრულა ხრამჰეს-2-ისა და ენგურჰესის საცდელ მიწისქვეშა გამონამუშევრებში. ტექნიკურ მეცნიერებათა კანდიდატი (1951). 1961 წლიდან - ინსტიტუტის მიწისქვეშა ნაგებობათა სექტორის გამგე. გამოიკვლია ნურეკის, ტოქტოგულის და ჩარვაკის ჰესების მიწისქვეშა ნაგებობები. აქტიურად მონაწილეობდა საგამომგონებლო საქმეში. გამოქვეყნა 50 სამეცნიერო-ტენიკური სტატია. მისი მოხსენებები თანაავტორებთან ერთად გამოქვეყნდა დიდი კაშხლების VIII საერთაშორისო კონგრესის, მთის ქანების მექანიკის I საერთაშორისო კონგრესისა და ევროპის ეკონომიკური ურთიერთდახმარების საბჭოს შრომათა კრებულებში. დაამუშავა გვირაბების რამდენიმე პროგრესული კონსტრუქცია და მათი სტატიკური გაანგარიშების მეთოდიკა.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.317