ალექსანდრე ფირცხალაიშვილი

დაბადების ადგილი: ქ. მოსკოვი.

დაამთავრა საქართველოს პოლიტექნიკური ინსტიტუტი ინჟინერ-ელექტრიკოსის კვალიფიკაციით 1960 წელს.

მუშაობა დაიწყო ქარხანა "ელექტროშედუღებაში" ინჟინერ-ტექნოლოგად. 1961 წლიდან მუშაობდა სამეცნიერო-საწარმოო გაერთიანება "ელვას" ხელსაწყოთმშენებლობისა და ავტომატიზაციის საშუალებათა სამეცნიერო-კვლევით ინსტიტუტში ინჟინრად, უფროს ინჟინრად, ელექტრონული გამოთვლითი მანქანების კონსტრუირებისა და დანერგვის ჯგუფის ხელმძღვანელად; 1976-1988წწ. - მთავარი ინჟინერი-დირექტორის მოადგილე სამეცნიერო დარგში; მისი მონაწილეობით სამეცნიერო-საწარმო გაერთიანება "ელვა"-ში დაპროექტდა გამოთვლითი ტექნიკის სპეციალიზებული საშუალებები და დაინერგა სახალხო მეურნეობის სხვადასხვა დარგში; მონაწილეობდა ზაპოროჟიეს ატომური ელექტროსადგურის ტექნილოგიური პროცესების ავტომატური მართვის სისტემის სხვადასხვა კვანძის დაპროექტებაში და ობიექტზე დანერგვაში; 1988 წლიდან - "ქარენერგოს" საქართველოს ფილიალის დირექტორი; მისი ხელმძღვანელობით დაიწყო ქვეყანაში ქარის ელექტროსადგურის ცალკეული დანადგარების პროექტირება, დამზადება და მათი ობიექტებზე დანერგვა. ამით დასაბამი მიეცა საქართველოში ალტერნატიული ენერგეტიკის მნიშვნელოვან მიმართულებას; 1991 წლიდან მუშობდა საწარმოო გაერთიანება "ორიონის" გენერალურ დირექტორად; 1993 წლიდან - ქარხანა "პროგრესის" დირექტორად; ქარხანა აწარმოებდა იმ დროისათვის მოწინავე პროგრამულ საფუძველზე და წარმატებულ ტექნილოგიებზე აგებულ გამოთვლითი ტექნიკის საშუალებებს; 1999 წლიდან - საქართველოს ენერგეტიკის მარეგულირებელ ეროვნულ კომისიაში აღმასრულებელი დირექტორი, სერტიფიკაციის ცენტრისა და დეპარტამენტის უფროსი, მომხმარებელთა მომსახურების ხარისხის სფეროში მთავარი სპეცილისტი. გამოქვეყნებული აქვს 22 სამეცნიერო ნაშრომი. აქვს 4 გამოგონება.

წყარო: საქართველოს ენერგეტიკოსები=Georgian Power Engineers: ენციკლოპედია.- თბილისი, 2016.- გვ.326

• საქართველოს ენერგეტიკის აკადემია, წევრი
• საქართველოს საინჟინრო აკადემია, წევრი