გიორგი ქუთათელაძე

დაბადების ადგილი: დაბა ხონი, ქუთაისის მაზრა.
დაამთავრა ქუთაისის პროგიმნაზია 1908 წელს; ყაზანის სამხედრო სასწავლებელი 1911 წელს; 1917 წელს გაიარა კავკასიის ფრონტის გენშტაბის აკადემიური კურსები.

1914-1918წწ. მსახურობდა კავკასიის მე-6 მსროლელთა პოლკში პოდპორუჩიკის, შემდეგ პორუჩიკის წოდებით. მონაწილეობდა პირველ მსოფლიო ომში. 1915 წელს დაიჭრა. მიაღწია ბატალიონის მეთაურობას, კაპიტნის წოდებით. 1918-1921წწ. მსახურობდა დამოუკიდებელი საქართველოს ჯარში, 1921 წლიდან წითელ არმიაში. 1921-1922წწ. იყო 1-ლი ქართული მსროლელი დივიზიონის შტაბის უფროსის მოადგილე, ცალკეული არმიის შტაბის მეკავშირე საქართველოს სსრ სამხედრო-საზღვაო სქმეთა სახალხო კომისარიატთან, კავკასიის ცალკეული არმიის შტაბის ადიუტანტი; 1924 წლისთვის იყო 1-ლი ქართული მსროლელი პოლკის უფროსის მოადგილე. მისი შენაერთი მონაწილეობდა 1924 წელს აგვისტოს აჯანყების ჩახშობაში დასავლეთ საქართველოში. 1924 წელს ქუთათელაძემ დაამთავრა წითელი არმიის კომინტერნის სახელობის უმაღლესის ტაქტიკური სკოლა. 1924 წლიდან იყო 1-ლი ქართული მსროლელი (1931 წლიდან სამთომსროლელი) პოლკის მეთაური ქუთაისში. 1930 წლიდან ქუთათელაძე იყო კავკასიის წითელი არმიის მეთაურის თანაშემწე; 1930 წელს მიღებულ იქნა საკავშირო კომპარტიის წევრობის კანდიდატად. გახდა კავკასიის წითელი არმიის მეთაურის თანაშემწე. 1933 წლიდან  კომდივი, მე-9 მსროლელთა კორპუსის მეთაური ქალაქ კრასნოდარში; 1935 წლიდან იყო წითელი არმიის ამიერკავკასიის სამხედრო ოლქის მეთაურის თანაშემწე მატერიალური უზრუნველყოფის დარგში, 1936 წლიდან დივიზიის კომისარი წითელი არმიის ჩრდილოკავკასიის სამხედრო ოლქში. 1937-1938წწ. დიდი ტერორის დროს დააპატიმრეს კრასნოდარში, 1937 წლის 19 აპრილს. 1937 წლის 13 ივლისს, თბილისში, "ზინოვიევურ-ტროცკისტული, ტერორისტული, მავნებლური ორგანიზაციის წევრობის" ბრალდებით სსრკ უზენაესი სასამართლოს სამხედრო კოლეგიის გამსვლელმა სესიამ გიორგი ქუთათელაძეს დახვერტა მიუსაჯა. დახვრიტეს 1937 წლის 14 ივლისს. შინსახკომმა, როგორც "ხალხის მტრის ოჯახის წევრი", დააპატიმრეს გიორგი ქუთათელაძის მეუღლე - ნინო სიამაშვილი-ქუთათელაძე და 8 წლით გადაასახლეს "შრომა-გასწორების კოლონიაში". გიორგი ქუთათელაძე რეაბილიტირებულია სსრკ უზენაესი სასამართლოს სამხედრო კოლეგიის მიერ 1956 წლის 28 ნოემბერს.

წყარო: ქართული საბჭოთა ენციკლოპედია, ტ. 10, თბ., 1986. -გვ. 568; საზოგადოებრივი არქივი: archive.ge

• საქართველოს სსრ ცენტრალური აღმასრულებელი კომიტეტი, წევრი (1928-1936)

• 1916 - წმინდა სტანისლავის III ხარისხის ორდენი (ხმლებით და ბაფთით)
• 1916 - წმინდა ანას III ხარისხის ორდენი (ხმლებით და ბაფთით)
• 1915 - წმინდა ვლადიმირის IV ხარისხის ორდენი (ხმლებით და ბაფთით)
• საქართველოს სსრ შრომის წითელი დროშის ორდენი
• წითელი დროშის ორდენი
• წითელი ვარსკვლავის ორდენი