მურთაზ დევაძე

დაბადების ადგილი: სოფელი ურეხი, ხელვაჩაურის რაიონი, აჭარის ასსრ.

დაამთავრა ბათუმის საზღვაოსნო სასწავლებლის გემთწამყვანი ფაკულტეტი 1990 წელს; ბათუმის სახელმწიფო საზღვაო აკადემიის საზღვაო-საინჟინრო ფაკულტეტი შორეული ნაოსნობის შტურმანის - ინჟინერ - ნავიგატორის სპეციალობით 2005 წელს.

ზღვაში შრომითი საქმიანობა თავდაპირველად საქართველოს საზღვაო სანაოსნოს გემებზე, 1990 წლიდან შორეული ნაოსნობის კაპიტნის მეოთხე თანაშემწედ დაიწყო; მომდევნო წლებში ქართულ-ინგლისური ერთობლივი კომპანია «ANGLO-GEORGIAN SHIPPING»-ისა და «ABC MARITIME»-ს მართვის ქვეშ მყოფი გემების კაპიტნის მესამე, მეორე და უფროსი თანაშემწის პოზიციებზე მყოფმა გაიარა საზღვაო შტურმანობის ყველა საფეხური და საბოლოოდ იგი თავად დაამტკიცეს შორეული ნაოსნობის კაპიტნად; 2006-2009წწ. «EASTWIND SHIPMANAGEMENT»-ის ბათუმის წარმომადგენლობის ხელმძღვანელი; 2009-2015წწ. წლებში მსოფლიოს ერთ-ერთი მსხვილი და თვალსაჩინო გერმანული სანაოსნო კომპანია - «COLUMBIA SHIPMANAGEMENT»-ის გემების კაპიტანია; 2014 წლიდან ბათუმის საზღვაო ნავსადგურის ლოცმანის პოზიციაზე მყოფი იგი ასევე ეწევა პროფესიული საქმიანობას სალოცმანო კომპანია «BLACK SEA PILOT SERVICE LTD»-ში; იმავდროულად ნაპირზე ყოფნისას იწყებს პედაგოგიურ საქმიანობას: იყო ბათუმის სახელმწიფო საზღვაო აკადემიის საზღვაო-საინჟინრო ფაკულტეტის დეკანი (2010-2014), აკადემიის მეზღვაურთა წვრთნისა და სერტიფიცირების ცენტრის უფროსი (2017-2020), საზღვაო აკადემიის ფოთში ახლად დაარსებული ფილიალის საზღვაო - სასწავლო ცენტრის ხელმძღვანელი (2020-2021), 2021 წლიდან კი სასწავლო მიმართულებით ბათუმის სახელმწიფო საზღვაო აკადემიის რექტორის მოადგილე და რექტორის მოვალეობის შემსრულებლი; 2022 წელს საქართველოს ეკონომიკისა და მდგრადი განვითარების მინისტრის ბრძანებით მურთაზ დევაძე ბათუმის სახელმწიფო საზღვაო აკადემიის რექტორად დაინიშნა. შორეული ნაოსნობის კაპიტანი.

წყარო: პაატა ტაბაღუას საავტორო გვერდი: "საქართველო საზღვაო ქვეყანაა": facebook.com; ბათუმის სახელმწიფო საზღვაო აკადემია: facebook.com