ივანე აბესალომოვი

1840-იან წლებში მსახურობდა მეფისნაცვლის სამოქალაქო კანცელარიაში. შესაძლოა, ეს ის ივანე სოლომონის ძე აბესალომოვი იყოს (ივანე აბესალომოვი სოლომონის ძე იყო), რომლის სახელობის "სტიპენდიის ვაკანსია" გახსნილა 1900 წ. თბილისის ქალთა და ვაჟთა გიმნაზიების თითო მოსწავლისათვის (სტიპენდიას გიმნაზისტებს ქალაქის გამგეობა ანიჭებდა – "ცნობის ფურცელი" 1900). ივანე აბესალომოვს "ტფილისის კერძო ბიბლიოთეკაში" შეტანილი აქვს 1844 წლის საწევრო თანხის ნახევარი (15 მანეთი ვერცხლით)."პირველი საბიბლიოთეკო ამხანაგობა ტფილისში" 1840 წელს თბილისში დიმიტრი ყიფიანის უშუალო ხელმძღვანელობით დაფუძნდა. ეს იყო პირველი საბიბლიოთეკო ამხანაგობა, რომელიც ქართველ საზოგადო მოღვაწეთა ინიციატივით დაარსდა. დამფუძნებელთა შორის იყვნენ: დიმიტრი ყიფიანი, ზაქარია ერისთავი, ზაქარია ფალავანდიშვილი, ვახტანგ ორბელიანი, ელიზბარ ერისთავი, ზაქარია ორბელიანი, კონსტანტინე დადიანი, ალექსანდრე ონიკაშვილი, ლევან მელიქიშვილი, ნიკოლოზ (ტატო) ბარათაშვილი, თევდორე კოცებუ, ზნაჩკო იავორსკი, ნიკოლოზ ბეზაკი, კონსტანტინე ორლოვსკი, მიხეილ თუმანიშვილი, დიმიტრი ჯორჯაძე, დავით არზანოვი, სერგეი ვასილკოვსკი, დავით ჭავჭავაძე, გრიგოლ ორბელიანი და ივანე ორბელიანი. სახელმწიფო მოხელე. 

წყარო: ნარკვევები, ლიტერატურული პორტრეტები, პუბლიკაციები / თამაზ ჯოლოგუა.-თბ.,2022.-გვ.54