იროდიონ მაჩაიძე

დაბადების ადგილი: სოფელი ჭიშრე, ონის რაიონი.

სწავლობდა ქუთაისის რეალურ სასწავლებელში; დაამთავრა ქუთაისის ინდუსტრიული ტექნიკუმი 1936 წელს; ქუთაისის პედაგოგიური ინსტიტუტის ისტორიის ფაკულტეტი 1941 წელს. 

მუშაობდა აბრეშუმის ძაფსაღებ ფაბრიკაში. 1941 წლის დეკემბერში მოხალისედ წავიდა საბჭოთა კავშირის დიდი სამამულო ომის ფრონტზე. დაამთავრა ბაქოს სამხედრო საზენიტო არტილერიის სასწავლებელი, მიიღო ლეიტენანტის წოდება და დაინიშნა მსროლელი ოცეულის მეთაურად. 1942 წლის მარტში ის მძიმედ დაჭრეს. გამოჯანმრთელების შემდეგ იგი გაანაწილეს ზურგში სამუშაოდ. 1942 წლის ივლისში გაიგზავნა ამიერკავკასიის სამხედრო ოლქის არტილერიის კადრების განყოფილების განკარგულებაში, მსახურობდა თავის სამხედრო სპეციალობით ყაზანში, ქუთაისსა და მანგლისში, 296-ე დივიზიაში ტანკსაწინააღმდეგო ბატარეის მეთაურად. მას მიანიჭეს კაპიტნის სამხედრო წოდება. სამამულო ომის დამთავრების შემდეგ მუშაობდა თბილისის სახელმწიფო უნივერსიტეტში, სადაც დაიცვა საკანდიდატო დისერტაცია. 1976-1987წწ. იყო თბილისის სამედიცინო ინსტიტუტში ისტორიის კათედრის გამგე. 1981 წელს დაიცვა დისერტაცია ისტორიის მეცნიერებათა დოქტორის ხარისხის მოსაპოვებლად და ერთი წლის შემდეგ მიიღო პროფესორის წოდება. მას გამოქვეყნებული აქვს 70-ზე მეტი სამეცნიერო ნაშრიმი, მათ შორის 4 მონოგრაფია. მისი ნაშრომები ძირითადად ეხება რუსეთში, ამიერკავკასიასა და საქართველოში XX საუკუნეში მოქმედი პოლიტიკური პარტიების მოღვაწეობის ისტორიას. იყო სამედიცინო უნივერსიტეტის ომისა და შრომის ვეტერანთა საბჭოს თავმჯდომარე, საზოგადოებრივ მეცნიერებათა კათედრების საბჭოს თავმჯდომარის მოადგილე და სხვა სამეცნიერო საბჭოს წევრი. დაჯილდოებულია ორდენითა და მრავალი მედლით.

წყარო: ომგადახდილი მეცნიერები : საგამომცემლო ცნობები. კრებული / შემდგ.: გრიგოლ ბრეგაძე. - თბ., 2000. გვ. 71-72

• ღირსების ორდენი
• მედალი "გერმანიაზე გამარჯვებისთვის"
• მედალი "კავკასიის დაცვისთვის"
• სამამულო ომის I ხარისხის ორდენი
• საქართველოს რესპუბლიკის უმაღლესი სკოლის დამსახურებული მუშაკი

• სკკპ ინტერნაციონალისტ-ლენინელთა პარტიაა (ავტორი). - თბილისი, საბჭოთა საქართველო, 1974. - 93გვ.
• სკკპ ხელმძღვანელი როლის ზრდა კომუნიზმის მშენებლობის პერიოდში : სკკპ XXIV ყრილობა (ავტორი). - თბილისი, საბჭოთა საქართველო, 1972. - 128გვ.
• ბოლშევიკური პარტია რუსეთის პირველი რევოლუციის წინ და რევოლუციის წლებში (1903-1907) (ავტორი). - თბილისი, საბჭოთა საქართველო, 1969. - 150გვ.