იოსებ ფეიქრიშვილი

დაბადების ადგილი: ქ. თელავი.

დაამთავრა თელავის პედაგოგიური ტექნიკუმი 1931 წელს; საქართველოს სასოფლო-სამეურნეო ინსტიტუტი 1941 წელს.

1933-1935წწ. მუშაობდა წინანდლის მეურნეობაში ჯერ უფროს მოანგარიშედ, შემდეგ ბუღალტრად; საბჭოთა კავშირის დიდი სამამულო ომის დაწყებიდანვე გაიწვიეს მოქმედ არმიაში, სამხედრო ქიმიურ აკადემიაში; მეთაურთა სპეციალური მოკლევადიანი კურსების გავლის შემდეგ მიენიჭა ლეიტენანტის წოდება და 1941 წლის ოქტომბერში გაგზავნეს ბრიანსკის ფრონტზე 287-ე მსროლელ დივიზიის ქიმიური ასეულის მეთაურის მოადგილედ; 1942 წლის ივლისში გადაიყვანეს ქიმიური სამსახურის უფროსად; 1942 წელს მიენიჭა ჯერ უფროსი ლეიტენანტის, შემდეგ კაპიტნის წოდება; მტრის ტერიტორიაზე მონაწილეობდა ბერლინის აღებისთვის ბრძოლაში, სადაც დაჭრის მიუხედავად ბრძოლის ველი არ მიუტოვებია; ბერლინის აღების შემდეგ ჩაება საომარ მოქმედებაში ქ. პრაღის განთავისუფლებისთვის; 1945 წლის ნოემბრიდან დემობილიზაციიის შემდეგ მუშაობა დაიწყო საქართველოს მევენახეობა-მეღვინეობის თელავის სამეცნიერო-კვლევით ინსტიტუტში უმცროს მეცნიერ მუშაკად; 1947-1950წწ. დაამთავრა ასპირანტურა მეღვინეობის განხრით. 1953 წელს დაიცვა საკანდიდატო დისერტაცია; მუშაობა განაგრძო ამავე ინსტიტუტის მესხეთის საყრდენი პუნქტის გამგედ; 1953 წლის ოქტომბერში გადაიყვანეს ახლად ჩამოყალიბებულ თელავის ზონალურ საცდელ სადგურში სწავლულ მდივნად; 1955 წელს გახდა მეღვინეობის განყოფილების უფროსი მეცნიერ თანამშრომელი; 1965 წელს გადაიყვანეს საქართველოს მებაღეობის, მევენახეობის და მეღვინეობის სამეცნიერო-კელევით ინსტიტუტში ახლადშექმნილ ანტიბიოტიკების განყოფილების გამგედ; გამოქვეყნებული აქვს 18 მეცნიერული შრომა და თანაავტორებთან ერთად მიღებული აქვს 4 საავტორო მოწმობა; მის მიერ გაწეული ექსპერიმენტული მუშაობის შედეგების საფუძველზე ალაზნის მარცხენა მხარე დაყოფილია 8 მიკრორაიონად. ყოველი მათგანი, ნიადაგობრივი და მიკროკლიმატური პირობების შესაბამისად, არსებული ვაზის ჯიშებიდან მიღებული ღვინოების ხასიათისა და ღირსების მიხედვით დაყოფილია აგრეთვე ცალკე უბნებად; მიღებულ შედეგებს დიდი მნიშენელობა აქვს საქართველოს ხარისხოვანი მეღვინეობის განვითარებისთვის. დაჯილდოებულია ორდენებითა და მედლებით.

წყარო: ომგადახდილი მეცნიერები : საგამომცემლო ცნობები. კრებული / შემდგ.: გრიგოლ ბრეგაძე. - თბ., 2000. გვ. 105-106

• მედალი "პრაღის გათავისუფლებისთვის"
• მედალი "ბერლინის აღებისთვის"
• მედალი "გერმანიაზე გამარჯვებისთვის"
• წითელი ვარსკვლავის ორდენი
• სამამულო ომის II სარისხის ორდენი