როლანდ ტატიშვილი

დაბადების ადგილი: ქ. თბილისში.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი 1970 წელს.

1963-1966 წლებში რ. ტატიშვილი თბილისის ტრამვაი-ტროლეიბუსების სამმართველოს თვითმოქმედი სახალხო ანსამბლის მოცეკვავე - მსახიობია. 1966-1970 წლებში იყო რუსთავის ქორეოგრაფიული ანსამბლის წამყვანი სოლისტი. 1970 წელს ნიჭიერი მოცეკვავე საქართველოს ხალხური ცეკვის სახელმწიფო აკადემიურ ანსამბლში ჩაირიცხა (ხელმძღვანელი ი. სუხიშვილი და ნ. რამიშვილი). 20 წელზე მეტხანს გამოდიოდა ამ სახელგანთქმულ ანსამბლში და მნიშვნელოვანი წვლილი შეჰქონდა მის დიდ წარმატებაში. რ. ტატიშვილის, როგორც ერთ-ერთი სოლისტის დამახასიათებელი თვისებებია შესრულების დახვეწილი მანერა, ტემპერამენტი და ტექნიკური სრულყოფა, განსაკუთრებით მთიულურ ცეკვებში. არის საკავშირო და საერთაშორისო ფესტივალების ლაურეატი, დაჯილდოებულია სიგელებითა და დიპლომებით.

წყარო: 2007 წლის საიუბილეო თარიღები : თეატრი, მუსიკა, კინო, ქორეოგრაფია.- თბ., 2007.- გვ.16; ქართული ხალხური ქორეოგრაფიის მოღვაწენი/ გიორგი სუხიშვილი.-თბ.,1988.- გვ.254

• 1985 - საქართველოს დამსახურებული არტისტი