ქეთევან ბარნოვი

დაიბადა სოციალ-დემოკრატი ნიკოლოზ ბარნოვის ოჯახში, რომელსაც დამოუკიდებელი საქართველოს მმართველობაში გარკვეული თანამდებობა ეკავა, იგი ოკუპაციის შემდეგ ოჯახით ემიგრაციაში წავიდა. ქეთევანი მაშინ სულ პატარა იყო, იზრდებოდა ქართული სულისკვეთებით, ქართული ენაც კარგად შეისწავლა, თუმცა სკოლაში ფრანგულად სწავლობდა. მეორე მსოფლიო ომის დაწყებისთანავე ქეთევანმა სანიტრად წასვლა მოინდომა, მაგრამ ასაკის გამო არ მიიღეს. 1940 წლის 18 ივნისს ინგლისის რადიოთი გენერალ დე გოლის მოწოდებას წინააღმდეგობისკენ, გერმანელების მიერ ოკუპირებლ საფრანგეთში დიდი გამოხმაურება ჰპოვა. ამის საპასუხოდ, 11 ნოემბერს – პირველი მსოფლიო ომის დასრულებისას, კომპიენის ტყეში, მარშალ ფოშის სალონ-ვაგონში გერმანიის მიერ კაპიტულაციაზე ხელმოწერის სიმბოლურ დღეს, ოკუპირებულ პარიზში, ეტუალის მოედანზე მოეწყო პატრიოტ სტუდენტთა მანიფესტაცია. მასში მონაწილეობდა ჯერ კიდევ სკოლის მოსწავლე ქეთევან ბარნოვი. ბევრ მათგანს ხელში ეჭირა ორი გრძელი ჯოხი, რაც ფრანგულად ჟღერს როგორც "დეუს გოლეს", მინიშნება დე გოლის მოწოდებაზე. 1941 წელს ქეთევან ბარნოვი დეკორატიული ხელოვნების უმაღლესი სკოლის სტუდენტი გახდა და ჩაება "რეზისტანტელთა"ქსელში კურიერად მონაწილეობდა ანტიჰიტლერულ და საპროტესტო აქციებში, რამდენჯერმე გადაურჩა დაპატიმრებას, უვნებლად გაიარა ოკუპაციის წლები, დაასრულა უმაღლესი და ცოლად გაჰყვა ბასკ არქიტექტორ შედოს. ფრანგული წინააღმდეგობის მოძრაობის წევრი. ქართული ემიგრაციის წარმომადგენელი.

წყარო: მეორე მსოფლიო ომი და ქართველი ემიგრანტი ქალები / რუსუდან დაუშვილი // ქართული ემიგრაცია.-თბილისი, 2022-2023.-N10-გვ.26; ქართველები საფრანგეთისთვის ბრძოლებში = Des georgiens pour la France : 1939-1945 წლები / ფრანსუაზ და რევაზ ნიკოლაძეები.-თბ.,2009.-გვ.80-84