შალვა კოკოჩაშვილი

დაბადების ადგილი: ქ. ქუთაისი.

დაამთავრა პეტერბურგის სამხედრო სამედიცინო აკადემია 1913 წელს.

1920 წელს იყო აბასთუმნის სანატორიუმის დირექტორი; 1925–1926წწ. ქუთაისის ჯანდაცვის დედათა და ბავშვთა დაცვის განყოფილების გამგე; 1931–1938წწ. ქუთაისის მთავარი პედიატრი; 1937–1938წწ. თავისივე დაარსებული ქუთაისის ბავშვთა პირველი საავადმყოფოს მთავარი ექიმი; სიცოცხლის ბოლომდე ხელმძღვანელობდა მისივე ინიციატივით შექმნილ (1925) ტუბერკულოზური დისპანსერის ბავშვთა განყოფილებას. ბავშვთა ტუბერკულოზის პროფილაქტიკისა და დაავადებასთან ბრძოლის საქმეში იყენებდა ბაქტერიოფაგით მკურნალობის ახალ მეთოდებს. მისი ხელმძღვანელობით და უშუალო მონაწილეობით ჩატარდა ორგანიზებული აცრები ბაგა-ბაღებსა და სკოლებში. ეწეოდა აქტიურ საზოგადოებრივ მოღვაწეობას. მეუღლესთან, ნ. ჩოლოყაშვილთან ერთად მნიშვნელოვანი წვლილი შეიტანა ქუთაისის მხარეთმცოდნეობის მუზეუმის დაარსებაში. მიღებული აქვს სახელმწიფო ჯილდოები. ბავშვთა ფთიზიატრი, ჯანდაცვის ორგანიზატორი.

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge