მიხეილ კონიაშვილი

დაბადების ადგილი: ქ. თბილისი.

დაამთავრა თბილისის ვაჟთა პირველი გიმნაზია 1896 წელს; მოსკოვის საიმპერატორო უნივერსიტეტის ფიზიკა-მათემატიკის ფაკულტეტი 1900 წელს.

უნივერსიტეტში სწავლის დროს იყო კავკასიის სასკოლო წრის წევრი და კავკასიის სასწავლო ოლქის სტიპენდიატი; 1900 წლიდან მათემათიკის მასწავლებლად მუშაობდა ქ. შუშის რეალურ სასწავლებელში, ორი წლის შემდეგ – ქ. სტავროპოლში, 1904 წლიდან თბილისის მესამე გიმნაზიაში; 1907‒1914წწ. თბილისის ქალთა პირველ გიმნაზიაში (1918 წლიდან ‒ დირექტორი); 1909 წელს მონაწილეობდა თბილისის ქალთა უმაღლესი კურსების (პირველი უმაღლესი სასწავლებელი კავკასიაში) შექმნაში; აქვე დაინიშნა ფიზიკისა და მათემატიკის კათედრის გამგედ; მისი ინიციატივით მოეწყო ფიზიკის ლაბორატორიები; 1913 წელს მისი ორგანიზატორობით თბილისში ჩატარდა ბუნებისმეტყველთა და ექიმთა XIII ყრილობა; 1921 წელს აირჩიეს თბილისის სახელმწიფო უნივერსიტეტის პროფესორთა საბჭოს წევრად; მრავალი წელი ასწავლიდა ელემენტარულ მათემატიკას, დიფერენციალურ და ინტეგრალურ აღრიცხვას, ასევე მათემატიკის სწავლების მეთოდებს; 1938 წლიდან იგი შეთავსებით მუშაობდა საქართველოს განათლების სამინისტროს პედაგოგიურ მეცნიერებათა სამეცნიერო-კვლევით ინსტიტუტში. მათემატიკის სწავლების მეთოდიკის ფუძემდებელი საქართველოში. 

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ. 150