დალი გოგეშვილი-იოდიშიენე

დაბადების ადგილი: სოფელი ნიგოეთი, ლანჩხუთის რაიონი.

სწავლობდა თბილისის სახელმწიფო უნივერსიტეტის ჟურნალისტიკის ფაკულტეტზე.

1967 წელს, მე-4 კურსის სტუდენტი საცხოვრებლად ლიტვაში გადავიდა (იქორწინა მხატვარ-რესტავრატორ იონას იოდიშიენზე); მთელი თავისი სიცოცხლე, შემოქმედებითი მოღვაწეობა ლიტვა-საქართველოს კულტურული ურთიერთობების განვითარებას მოახმარა; თერთმეტ თვეში შეისწავლა ლიტვური ენა და მაღალ პროფესიულ დონეზე მიჰყავდა რადიოგადაცემემბი ლიტვურად; მან ხელი მოჰკიდა მთარგმნელობით მუშაობასაც; ქართულიდან თარგმნა გურამ ფანჯიკიძის რომანი "მეშვიდე ცა", ამას მოჰყვა ცნობილი ქართველი მწერლების ნაწარმოებები (სულ 39 ავტორი): სერგო კლდიაშვილის "კაიშაურის სონატა", ნოდარ დუმბაძის "უმადური", ოტია იოსელიანის "ცირა და თბილი რძე", სოლომონ დემურხანაშვილის "სევდის ბაღი", ნანული ბოცვაძის "სასიძო" და სხვა; მისი თარგმანებით გაეცვნენ ლიტველი პატარები ქართულ ხალხურ ზღაპრებს; თავისი დაუღალავი შრომით რადიოში თუ ჟურნალ-გაზეთებში დ. გოგეშვილმა მალე გაითქვა სახელი და საქართველოს პოპულარიზაციისათვის დაიმსახურა ლიტვის რადიოპროგრამების პრიზი "საბჭოთა საქართველოში სამოგზაუროდ"; 1971-1972 წლებში ლიტვაში, ქალაქ ვილნიუსში მცხოვრებ დ. გოგეშვილის სახლში ჩაეყარა საფუძველი ლიტვა-საქართველოს კულტურულ ცენტრს; ლიტვური პოეზიის გაზაფხულში მონაწილეობა მიიღეს მისი ინიციატივით მიწვეულმა ქართველმა მწერლებმა; მისი ინიციატივით ლიტვის ხშირი სტუმრები იყვნენ: ლიანა ისაკაძე, ნოდარ ანდღულაძე, ზურაბ სოტკილავა, თვითმოქმედი კოლექტივები; ლიტველების დიდი ინტერესი და აღფრთოვანება გამოიწვია თუმანიშვილის თეატრის სტუმრობამაც; დიდი წარმატებით ჩაუვლია ქართული თეტრის სპექტაკლებს გოგი ქავთარიძისა და გიზო ზარნაძის რეჟისორობით; თბილისის 1989 წლის 9 აპრილის ტრაგედიამ შესძრა ლიტველ ქართველთა გულებიც, რის შედეგადაც ვილნიუსში მცხოვრებმა 38-მა ქართველმა შექმნა სათვისტომო - "ივერია", მას სათავეში ჩაუდგა და მისი პრეზიდენტი გახდა დ. გოგეშვილი.

წყარო: ჯანრი გოგეშვილის მიერ მოწოდებული ბიოგრაფიული მონაცემები; janri-gogeshvili-jg.blogspot.com