ლევან მანძულაშვილი

დაბადების ადგილი: სოფელი ზეღდულეთი, გორის მუნიციპალიტეტი.

წელიწადნახევარი სავალდებულო სამხედრო სამსახურში, შინაგან ჯარში იმსახურა, შემდეგ საქართველოს შეიარაღებულ ძალებში კონტრაქტით მეორე ბრიგადის 22-ე ბატალიონში ჩაირიცხა, რამდენიმე თვე კრწანისის პოლიგონზე გადიოდა წვრთნებს, შემდეგ ბატალიონი სენაკში გადავიდა (ქუთაისის მეორე ბრიგადა, დისლოკაციის ადგილი სენაკში იყო). შემდეგ  ლევან მანძულაშვილი 7 თვე ერაყში, ბაღდადში მსახურობდა. ერაყიდან დაბრუნებული სენაკში  ტანკსაწინააღმდეგო გადასატანი სარაკეტო კომპლექსის – "ფაგოტის" გათვლის მეთაური იყო. ომში 7 აგვისტოს წავიდა. კარალეთის გზაზე მისი ბატალიონი ნული-ავნევის მიმართულებით წავიდა. დაიღუპა ქვემო ნიქოზი-ზემო ხვითის გზაზე. ლევან მანძულაშვილი მეორე დღეს იპოვეს ხვითელებმა და სოფელში, სამების ეკლესიის სასაფლაოზე მიაბარეს მიწას. ლევანს ფორმაზე ეწერა – "22-ე ბატალიონი. ლევან მანძულაშვილი". სამშობლოსთვის დაღუპული გმირი დაღუპვიდან 19 დღის შემდეგ გადმოასვენეს საპატრიარქოს ძალისხმევით, გორში მამა გედეონმა ჩამოასვენა, დაკრძალეს სოფელში. სოფელ ზეღდულეთში არის მისი სახელობის ქუჩა. კაპრალი.

წყარო: გმირი : 2008 წლის აგვისტოს ომში დაღუპული ჯარისკაცების ხსოვნისადმი მიძღვნილი წიგნი: ნაწ. 1 / წიგნზე მუშაობდნენ: თორნიკე ყაჯრიშვილი, თამარ შარმიაშვილი, დავით ფაჩუაშვილი [და სხვ.].-თბ.,2010.-გვ.147-148

• 2008 - მედალი "მხედრული მამაცობისთვის" (გარდაცვალების შემდეგ)