ალექსეი ლოსევი

დაბადების ადგილი: ქ. ნოვოჩერკასკი.

დაამთავრა კლასიკური გიმნაზია 1911 წელს; მოსკოვის საიმპერატორო უნივერსიტეტის ისტორია-ფილოლოგიის ფაკულტეტი 1915 წელს.

მას ურთიერთობა ჰქონდა რუსული ინტელექტუალური აზრის საუკეთესო წამომადგენლებთან – ვ. ივანოვთან, ს. ბულგაკოვთან, ი. ილინთან, ს. ფრანკთან, ე. ტრუბეცკოისთან, პ. ფლორენსკისთან. XX ს. 20-იან წლებში შექმნილ ნაშრომებში ყოფიერებისა და აზროვნების უნივერსალური მოდელების გააზრებას, მეტაფიზიკური პოზიციების დასაბუთებას, ძირითადად, ქრისტიანული მეტაფიზიკის, ნეოპლატონური დიალექტიკის ქრისტიანული რეცეფციის, ჰეგელის დიალექტიკური მეთოდისა და ჰუსერლის ფენომენოლოგიის გავლენით ახორციელებდა. განავითარა ე. წ. "ენერგეტიკული სიმბოლიზმის" კონცეფცია. 1929 წელს მალულად ბერად აღიკვეცა. 1930 წელს ანტიმარქსისტული წიგნისთვის "მითის დიალექტიკა", ე. წ. მებრძოლი იდეალიზმის ბრალდებით დააპატიმრეს და გულაგში გადაასახლეს, საიდანაც დაინვალიდებული 1933 წელს გაათავისუფლეს. აკრძალული ჰქონდა ფილოსოფიური ტექსტების გამოცემა, მხოლოდ ი. სტალინის სიკვდილის შემდეგ (1953) შექმნა მონუმენტური ფილოსოფიური ნაშრომი: "ანტიკური ესთეტიკის ისტორია" (8-ტომეული, 1963–1988); "აღორძინების ესთეტიკაში" (1978) სიღრმისეულად და ორიგინალურად არის გააზრებული დასავლეთი კულტურისა და ისტორიული პროცესის შინაგანი ლოგიკა, რენესანსისა და ჰუმანიზმის ფილოსოფიური საფუძველი ნეოპლატონიზმის, ღმერთისა და სამყაროს ერთიანობის ნეოპლატონური თვალსაზრისის სახით. ის კარგად იცნობდა ქართულ ფილოსოფიურ აზროვნებას. იგი შუა საუკუნეების ქართველ მოაზროვნეებს მიიჩნევდა ნეოპლატონურ-არეოპაგიტული რენესანსის დამწყებებად ევროპაში და ხაზგასმით აღნიშნავდა ნეოპლატონიზმის თავისებურებას მათ ნააზრევში ("სიტყვა ქართულ ნეოპლატონიზმზე", 1986); აკად. ნ. კონრადთან ერთად არსებითად იზიარებდა შ. ნუცუბიძის "აღმოსავლური /ქართული რენესანსის თეორიას". ის "ქართული ნეოპლატონიზმის" ერთ-ერთ თეორეტიკოსადაც გვევლინება. პროფესორი (1919), ფილოლოგიის მეცნიერებათა დოქტორი (1943).

წყარო: საქართველოს მეცნიერებათა ეროვნული აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ.436-437

• მითის დიალექტიკა და სხვა ნაწარმოებები (თანაავტორი). - თბილისი, Carpe diem, 2017. - 520გვ.. - ISBN: 9789941273797
• თვალსაწიერი : თარგმანები/თამაზ ჩხენკელი (თანაავტორი) // სტატ. კრებული. - თბილისი, შპს "პეტიტი", 2013. - 266გვ.
• აღმოსავლური რენესანსი : ჩინეთი, ირანი, სომხეთი, საქართველო (ავტორი). - ბათუმი, "გამ-ბა აჭარის" პოლიგრაფ. ცენტრი, 2005. - 67გვ.