ანტონ ლუკეში

დაბადების ადგილი: ქ. ბროდი, ახლანდელი ჩეხეთი.

ჩეხეთის "სოკოლის" რეკომენდაციით საქართველოში ჩამოვიდა და დაინიშნა ტანვარჯიშის მასწავლებლად თბილისის ვაჟთა პირველ გიმნაზიაში (1896). მან შემდგომ წლებში ფასდაუდებელი სამსახური გაუწია ქართულ სპორტს. მისი ინიციატივით (1906) თბილისში დაარსდა საფეხბურთო კლუბი "კომეტა"; 1909 წელს მისი თაოსნობით ჩამოყალიბდა "შევარდენის" წინამორბედი სპორტული საზოგადოება "სოკოლი", რომლის წევრების დევიზი იყო: "ფიქრში – სამშობლო, გულში – სიმარდე და მკლავში – ძალა". აწყობდა სახალხო სპორტულ სანახაობებს და შეჯიბრებებს ტანვარჯიშში. სხვადასხვა დროს ტანვარჯიშს ასწავლიდა მიხეილის სამხედრო სასწავლებელში, ალექსანდრეს სამასწავლებლო ინსტიტუტში; 1908 წლიდან კითხულობდა ლექციას თავისსავე დაარსებულ "კავკასიის სამოსწავლო ოლქის ტანვარჯიშობის ყოველწლიურ პედაგოგიურ სამზადისში"; შეადგინა და გამოსცა ხუთი სახელმძღვანელო. 1912 წელს პრაღაში ქართველმა სპორტსმენებმა (გ. ეგნატაშვილი, ი. ლორთქიფანიძე, გ. და თ. ნიკოლაძეები, ა. ბაქრაძე, გ. ბერელაშვილი, ი. ბერიძე და სხვ.) დაბალ თანრიგში გუნდური გამარჯვება მოიპოვეს. 1918 წელს აირჩიეს თბილისის "შევარდენის" საპატიო წევრად. 1919 წელს დაბრუნდა სამშობლოში. ჩეხი სპორტსმენი (ტანვარჯიში).

წყარო: საქართველოს მეცნიერებათა ეროვნული აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge; საქართველო: ენციკლოპედია: ტ.5. -თბ.,2023. -გვ.444

• Гимнастический бокс : Руководство для ведения общих упражнений в сокольских гимнастических обществах, в учебных заведениях и в войсках (ავტორი). - Тбилиси, тип. Канцелярии наместника е. и. в. на Кавказе, 1914. - 100с.