გიორგი მელიქიძე

დაბადების ადგილი: ქ. თბილისი.

დაამთავრა თბილისის სახელმწიფო უნივერსიტეტის ფიზიკის ფაკულტეტი, სპეციალობით თეორიული ფიზიკა 1975 წელს.

1976 წლიდან მუშაობს საქართველოს მეცნიერებათა აკადემიის აბასთუმნის ასტროფიზიკურ ობსერვატორიაში (2007 წლიდან - საქართველოს ე. ხარაძის სახელობის ეროვნული ასტროფიზიკური ობსერვატორია); 1992-1996წწ. იყო დირექტორის მოადგილე სამეცნიერო ნაწილში; 2021 წლიდან მთავარი მეცნიერი თანამშრომელი. 1996 წლიდან მუშაობს ქ. ზიელონა გურას (პოლონეთი) უნივერსიტეტში (2008 წლიდან სრული პროფესორი). იყო ფიზიკისა და ასტრონომიის ფაკულტეტის დეკანი; 2016–2020წწ. პრორექტორი სამეცნიერო და საერთაშორისო ურთიერთობათა დარგში. მისი სამეცნიერო კვლევები ეხება რელატივისტური პლაზმის, პულსარების რადიო და მაღალი სიხშირის გამოსხივების შესწავლას, მონაწილეობს პულსარების გამოსხივების დაკვირვებებთან დაკავშირებულ პროექტებში. ეწევა ნაყოფიერ პედაგოგიურ მუშაობას. არის მრავალი სამეცნიერო ნაშრომის ავტორი, რომელთა უმრავლესობა გამოქვეყნებულია წამყვან საერთაშორისო ჟურნალებში. ასტროფიზიკოსი. ფიზიკა-მათემატიკის მეცნიერებათა დოქტორი (1996), პროფესორი (2004); პოლონეთის კანონმდებლობის შესაბამისად მას პროფესორის წოდება მიანიჭა პოლონეთის პრეზიდენტმა.

წყარო: საქართველოს მეცნიერებათა ეროვნული  აკადემია: ქართული ენციკლოპედიის ი. აბაშიძის სახელობის მთავარი სამეცნიერო რედაქცია: georgianencyclopedia.ge