ივანე მაზმიშვილი

დაბადების ადგილი: სოფელი მეტეხი, კასპის რაიონი.

1914-1915 წლებში მუშაობდა ტელეფონის ქსელის შემკეთებლად, 1925-1927 წლებში თელასში უფროს მემონტაჟედ, 1927-1928 წლებში კი მუშაობდა მოსკოვის განყოფილების ელექტროქსელმშენში; 1930-1933 წლებში – რკინიგზაზე,  ორთქმავალთა შემკეთებელ ელექტრონულ საამქროში. საგამომგონებლო მუშაობას შეუდგა 1928 წლიდან, ჰქონდა მრავალი გამოგონება, რომელთა უმეტესობა სათანადო დაწესებულებათა მიერ განხილული და მოწონებული იყო, მათი ეფექტურობა –დადასტურებული შრომის ნაყოფიერების ზრდის, ფიზიკური შრომის მექანიზაციით შეცვლისა და ეკონომიის თვალსაზრისით. ივანე მაზმიშვილს ეკუთვნის შემდეგი გამოგონებები: ელექტროხაზის დამცველი კოჭი – გაყვანილი ხაზის გადაწვისა და ხანძრის გაჩენის საშიშროების ამცილებელი; საცობის ბოთლიდან ამოსაღები მანქანა, ე. ი. ბოთლიდან დაუზიანებელი საცობის ამომღები; საცობის დასაცობი მანქანა; გაჯის დასაფქვავი მანქანა; კედლების სალესი მანქანა; ელექტროღუმელი-საკუჭნაო; აგურ-კრამიტის საჭრელი მანქანა; მარცვლეულის საშრობი მანქანა; თევზსაჭერი ბადე-მანქანა – მექანიზაციის წესით თევზის საჭერი; მექანიკური აბანო. რაციონალიზატორი.

წყარო: ქართველ მოღვაწეთა ლექსიკონი, 1801-1952: ტ. III მ-რ / იოსებ იმედაშვილი.-თბ.,2021.-გვ.6