სპარტაკ ქობულია

დაბადების ადგილი: სოფელი მარანი, აბაშის რაიონი.

დაამთავრა თბილისის სახელმწიფო უნივერსიტეტის ჟურნალისტიკის ფაკულტეტი 1972 წელს.

სტუდენტობის წლებში იყო თბილისის უნივერსიტეტის პრესცენტრის ხელმძღვანელი და გაზეთ "თბილისის უნივერსიტეტის" განყოფილების შტატგარეშე გამგე, სტუდენტთა სასწავლო ჟურნალ-გაზეთების სარედაქციო კოლეგიის თავმჯდომარე. უნივერსიტეტის დამთავრების შემდეგ მუშაობა დაიწყო გაზეთ "ახალგაზრდა კომუნისტის" რედაქციაში. ამ გაზეთში განვლო მან პრაქტიკოსი ჟურნალისტის გზა: იყო კორესპონდენტი, პასუხისმგებელი მდივნის მოადგილე, განყოფილების გამგე, პასუხისმგებელი მდივანი. 1981 წელს დააწინაურეს გაზეთ "ქუთაისის" მთავარ რედაქტორად. 1988-1991წწ. იყო გაზეთ "სახალხო განათლების" (შემდეგ "განათლების", "ერის") მთავარი რედაქტორის მოადგილე; 1993 წლის დეკემბრიდან არის გაზეთ "საქართველოს რესპუბლიკის" მთავარი რედაქტორის მოადგილე. ორი პუბლიცისტური კრებულის და 1000–ზე მეტი პრობლემური სტატიის ავტორი. 

წყარო: ნახევარი საუკუნე თეთრ ტაძარში : შტრიხები ჟურნალისტიკის ფაკ. მატიანისათვის / იზოლდა ხაინდრავა.-თბ.,2005.-გვ.164

• საქართველოს ჟურნალისტთა ფედერაცია, წევრი

• ღირსების ორდენი