თამარ ბოჭორიშვილი

დაბადების ადგილი: ქ. მოსკოვი, რუსეთის ფედერაცია.

დაამთავრა თბილისის სახელმწიფო სამედიცინო ინსტიტუტის სამკურნალო ფაკულტეტი 1977 წელს.

1977-1978 წწ. იყო საქართველოს რესპუბლიკური ცენტრალური კლინიკური საავადმყოფოს ექიმი-ინტერნი; 1977-1987წწ. რესპუბლიკური კლინიკური ინფექციური საავადმყოფოს ექიმი-ორდინატორი; 1987-1992წწ. რესპუბლიკური სეფსისის საწინააღმდეგო ცენტრის თერაპიული განყოფილების გამგე; 1990-1991წწ. თბილისის ექიმთა დახელოვნების სახელმწიფო ინსტიტუტის ინფექციურ სნეულებათა კათედრის ასისტენტი; 1992-1994წწ. შეთავსებით თბილისის ექიმთა დახელოვნების სახელმწიფო ინსტიტუტის ინფექციურ სნეულებათა კათედრის დოცენტია; 1997 წელს ექიმთა დიპლომის შემდგომი განათლების სახელმწიფო სამედიცინო აკადემიის ინფექციურ სნეულებათა კათედრის პროფესორი; 1998 წლიდან კათედრის გამგის მოვალეობის შემსრულებელი; 1999-2003წწ. აკადემიის ინფექციურ სნეულებათა კათედრის გამგე; პროფესორ ბოჭორიშვილის პედაგოგიური მოღვაწეობა ძირითადად მიმდინარეობდა ექიმთა დიპლომის შემდგომი განათლების სახელმწიფო სამედიცინო აკადემიის ინფექციურ სნეულებათა კათედრაზე, მიჰყავდა პრაქტიკული მეცადინეობებისა და ლექციების კურსი ექიმ მსმენელებთან. 63 მეცნიერული ნაშრომის ავტორი, აქედან 1 მონოგრაფიაა. რესპუბლიკის სეფსისოლოგ-კონსულტანტი. მედიცინის მეცნიერებათა კანდიდატი (1985), მედიცინის მეცნიერებათა დოქტორი (1992), პროფესორი.

საკანდიდატო დისერტაციის თემა - "იმუნოთერაპიის სხვადასხვა მეთოდისა და ვენური ფაგოთერაპიის ეფექტურობის კლინიკური შეფასება გენერალიზებული სტაფილოკოკური ინფექციის დროს", დაიცვა 1985 წელს, თბილისი; სადოქტორო დისერტაციის თემა - "თერაპიული სეფსისის კლინიკა, დიაგნოსტიკა და მკურნალობა", დაიცვა 1992 წელს, ქ. მოსკოვი.

წყარო: საქართველოს სამედიცინო კალენდარი: ნაწ.I / ჯუმბერ ქორჩილავა.-თბ.,2010.-გვ.33-34