ავთანდილ პატარაია

დაბადების ადგილი: სოფელი ბანძა, გეგეჭკორის რაიონი (ახ. მარტვილის მუნიციპალიტეტი).

დაამთავრა თბილისის სახელმწიფო უნივერსიტეტის ფიზიკა-ტექნიკის ფაკულტეტი 1953 წელს; თბილისის სახელმწიფო უნივერსიტეტის ასპირანტურა თეორიული ფიზიკის განხრით (ხელმძღ. აკად. ვ. მამასახლისოვი) 1956 წელს.

1957-1958წწ. მუშაობდა საქართველოს პოლიტექნიკურ ინსტიტუტში ფიზიკის კათედრაზე ასისტენტად; 1958-1976წწ. ფიზიკის ინსტიტუტში უმცროს მეცნიერ-თანამშრომლად, უფროს მეცნიერ-თანამშრომლად; 1977 წლიდან აბასთუმნის ასტროფიზიკის ობსერვატორიაში უფროს, ხოლო შემდგომ წამყვან და მთავარ მეცნიერ თანამშრომლად; 1996 წლიდან ამავე ობსერვატორიაში პლაზმური ასტროფიზიკის განყოფილების გამგედ; სამეცნიერო მოღვაწეობის სფერო: ატომბირთვის ფიზიკა, პლაზმის ფიზიკა და პლაზმური ასტროფიზიკა; მის მიერ პირველადაა გამოკვლეული არაწრფივი ტალღები (სოლიტონები) და ამ ტალღების მოდულაციური არამდგრადობა მრავალკომპონენტიან პლაზმაში; დაუჯახებელი დარტყმითი ტალღების სტრუქტურა იონებისა და ჩაჭერილი ნაწილაკების ლარმორის რადიუსების ეფექტის გათვალისწინებით; ლენგმიურის, ალვენისა და მაგნიტობგერითი ტალღების მოდულაციური არამდგრადობა და სოლიტონები ელექტრონულ-პოზიტრონულ ტალღაში; არაწრფივი ტალღების მოდულაციური არამდგრადობა და სოლიტონები შიდა გრავიტაციულ და როსბის ტალღებისთვის; მზის სპიკულთა მოდელი, რომელიც კარგად ხსნის სპექტრულ სტრუქტურას წყალბადისა და ჰელიუმის ხაზებში, რაც დაწვრილებითაა აღწერილი აბასთუმნის ობსერვატორიაში ჩატარებული ექსპერიმენტების შედეგად; არის 120 სამეცნიერო შრომის ავტორი; 6 საკანდიდატო დისერატაციის ხელმძღვანელი. ასტროფიზიკოსი, ილიას სახელმწიფო უნივერსიტეტის მკვლევარი, ფიზიკა-მათემატიკის მეცნიერებათა დოქტორი (1971), პროფესორი, საერთაშორისო დონის მეცნიერი, ახალგაზრდა სამეცნიერო კადრების აღმზრდელი.

წყარო: ავთანდილ პატარაია : განცხადება გარდაცვალების შესახებ // საქართველოს რესპუბლიკა. - თბილისი, 2011. - 20 მაისი. - N93 (6704). - 11 გვ.