მარიამ ყამარაული

დაბადების ადგილი: ქ. თბილისი. 

2010 წელს დაამთავრა ფრანკფურტის გოეთეს სახელობის გიმნაზია და სწავლა გააგრძელა გოეთეს სახელობის ფრანკფურტის უნივერსიტეტში; 2010-2015 წლებში გაიარა ბაკალავრიატისა და მაგისტრატურის  პროგრამა კავკასიოლოგიის სპეციალობით; 2015 წელს მოიპოვა საერთაშორისო სტრუქტურირებული სადოქტორო სკოლის "ნომინალური მოდიფიკაცია" სტიპენდია, რომელიც წარმატებით დაასრულა 2018 წელს.

2021 წლიდან არის ჰამბურგის უნივერსიტეტში მეცნიერ-თანამშრომელი საერთაშორისო პროექტში DELICATE-წიგნიერების განვითარება კავკასიის ტერიტორიებზე, სადაც მუშაობს ქართული ხელნაწერების გაშიფვრაზე თანამედროვე ტექნოლოგიების გამოყენებით. 2015 წლიდან ლექციებს კითხულობს ფრანკფურტის უნივერსიტეტის ემპირიული ენათმეცნიერების ინსტიტუტში, 2020 წლიდან კი მიჰყავს ძირითადი და არჩევითი სალექციო კურსები: ენათმეცნიერების შესავალი, სინტაქსის საკითხები, პრაგმატიკა, ენობრივი ტიპოლოგიის საფუძვლები, ენათმეცნიერების სპეციალური პრობლემები, ტყუილი და ენობრივი მანიპულაცია. პედაგოგიური მოღვაწეობის ამ პერიოდში ოთხჯერ არის ნომინირებული  ფრანკფურტის გოეთეს უნივერსიტეტის ყოველწლიურ პრიზზე "შესანიშნავი სწავლება" (1822-Lehrpreis für Exzellente Lehre), როგორც საუკეთესო ლექტორი. აქტიურად ეწევა სამეცნიერო მოღვაწეობას. გამოქვეყნებული აქვს მონოგრაფია "სახელური დომენები ქართულში" და ნაშრომები "შესავალი დიგიტალურ ქართველოლოგიაში" (თანაავტორი), "ვეფხისტყაოსნის" აფხაზური თარგმანების სიხშირული ლექსიკონი" (თანაავტორი); არის 18 სამეცნიერო სტატიისა და 23 საკონფერენციო მოხსენების ავტორი. აქტიურად მოღვაწეობს დიგიტალური ქართველოლოგიის სფეროში: ხელმძღვანელობს საერთაშორისო პროექტის "Rustaveli goes digital" განვითარებას (ბეტა-ვერსია), არის ციფრული რესურსების GEABCO (geabco.com) და MyRustaveli (myrustaveli.com) პორტალის ტექნოლოგიური ჩარჩოს ავტორი. ეწევა სარედაქციო მოღვაწეობას: არის დიგიტალური ჰუმანიტარიის აკადემია-საქართველოს ორენოვანი რეფერირებადი ახალგაზრდული სამეცნიერო ონლაინჟურნალის "მილენიუმი" (adh.ge) მთავარი რედაქტორი და სამეცნიერო სერიის "ქართული პოლიტიკური ზეპირმეტყველების დისკურსი" ერთ-ერთი რედაქტორი. 2018 წელს  ფრანკფურტის უნივერსიტეტის ემპირიული ენათმეცნიერების ინსტიტუტში დაიცვა სადოქტორო დისერტაცია თემაზე:  "სახელური დომენები ქართულში-დიაქრონიული ანალიზი" (სამეცნიერო ხელმძღვანელი პროფ. ი. გიპერტი) და მიენიჭა დოქტორის ხარისხი. 

წყარო: შოთა რუსთაველის საქართველოს ეროვნული სამეცნიერო ფონდის პორტალი: rustaveli.org.ge