ანახანუმ ერისთავი

"ბატონ ანახანუმის", ზაალ ერისთავის ასულის დავალებით იესე ჩხეიძემ 1693 წელს გადაწერა სტოდიერი (სტოდიერი (სტუდიური) არის წმინდა თეოდორე სტუდიელის ნაშრომი (Testamentum), რომელიც შედგება ხუთი ნაწილისაგან და წარმოადგენს ბერმონაზვნურ წესდებას. იგი გიორგი ათონელმა თარგმნა, ხოლო ათონელი ზოსიმე ეწეოდა ამ ხელნაწერის გადაწერას). გადამწერი მომგებელს ახსენებს ხელნაწერის ერთ-ერთ გვერდზე: "ქრისტე მფლობელო ყოველთა სუფევათაო, ადიდე შენ მიერითა კურთხევითა ორსავე ცხორებასა შინა ბატონი ანახანუმ და ახმარე სიგრძესა შინა დღეთა წმიდაი ესე და სულთა განმანათლებელი სტოდიერი ესე". ანახანუმი შეიძლება ყოფილიყო მეამბოხე დიდებულის, ზაალ არაგვის ერისთავის (გარდაიცვალა 1661 წელს) ასულად, მაგრამ ასეთი სახელის მატარებელი პირი ზაალის შვილთა შორის თითქოს არ ჩანს.

წყარო: ძველი ქართველი მწიგნობარი ქალები /იზოლდა ქაფიაშვილი.-თბ.,1994.-გვ.98